Vawiin Dt.07.06.2016 (Thawhlehni) chawhma dar 9:30 khan Financial Education Training Programme chu SCERT Auditorium-ah School Education Minister Pu. H. Rohluna’n a hawng.

Pu.H.Rohluna, School Education Minister chuan thu sawiin kan ram zirnain bung thar a kaina tur Financial Education Training, National Institute of Securities Markets(NISM), Mumbai- in a buatsaih chu lawmawm a tih thu a sawi a. Financial Literacy-ah kan hniam em avangin hetiang training hi buatsaih a ni, a ti. 2011 Census-in a tarlan angin rampumah ziak leh chhiar thiam tam lamah 3-na dinhmun hauh mah ila, sum leh pai enkawl lamah kan la hnufual hle a, hei hian kan ram sum leh pai dinhmun thanna tur pawh a tithuanawp nasa hle a ni, a ti. Chiahpuamah Mizote kan mualpho va, chubakah loan lakte kan duh a, a pung sang tak, Nationalised Bank aia a leta pungte a lo ni a, hengte hi tam takin an lo hre si lo va, a pawi thei hle tiin Sumdawnnain ram sum leh pai che velah awmzia thui tak a neih tawh avangin sum leh pai kaihhnawih heng- Banking, sum lakluh, sum hman dan leh sum khawl, a peipun lam, insurance, stock market, credit card leh thil dangte chiang zawka kan hriat a tul tawh hle a ni, a ti.

Pu Rohluna chuan Sorkar-in Financial Education bul tanna atan School 120 a thlang chhuak a, hemi atan hian NISM, Mumbai chuan Class VI- Class X zirlaite tan zirlaibu a pek dawn bakah zirtirtute zirtirna an pe dawn bawk tih sawiin he Financial Education Training-a tel zawng zawngte chu ngun tak leh chik taka inzir turin a chah a. Zirlai, chhungkua leh thiante hnenah pawh Financial Education pawimawhzia hlanchhawng zela keimahni, kan tu leh fate tana hmalam hun eng siam tura ngun taka inzir turin Minister chuan kalkhawmte a chah.

He training kalhmang tur hi G.P. Garg, Head, National Centre for Financial Education(NCFE) chuan a sawi a, Zirlaite tana Financial Literacy a pawimawh dan te, kan nunhonaah a pawimawh tawh dante a tarlang a, Mizoram chu kawng thenkhatah tha viau mah ila, Financial Knowledge-ah kan that tawk lohnate a tarlang bawk. Sandip Ghose, Director, National Institute of Securities Markets(NISM) pawhin thu sawiin Financial Education pawimawhna a tarlang bawk.

Financial Education Training Programme hawnna inkhawm Pu K.Lalthawmmawia,IAS, Director, School Education Department kaihhruaiah hian MBSE Chairman, SCERT Director, School Education Officer te leh High School leh Middle School thlan chhuah zirtirtute an tel a ni.