810/2024-2025

Dated Thenzawl, the 14th June, 2024: Vawiin khan Chief Minister Pu Lalduhoma chuan a bial chhung, Thenzawl Higher Secondary School Alumni ten an school in kum 20 an tlin an lawmna leh kumin MBSE Exam-a pass tha zualte chawimawina hun an buatsaih chu a hmanpui.

Thu a sawinaah Chief Minister chuan, kum 2004 khan Thenzawl Village Council te chuan mamawhna a san em avangin he school hi an din a. An din chhan ang ngeiin Thenzawl leh a chhehvel khuaten an chhawr tangkai hle. Result in neih that thin avangin admission pawh lak sen loh in nei kumtin tih thlengin ka hriatpui a ni. Hun harsa tam tak paltlanga kum 20 tluang taka a kal thei hi ka lawm a, a kal zelna turah pawh duhsakna ka hlan. In mamawh leh harsatna te pawh hi a theih ang angin kan ngaihtuah zel dawn a, engkim ka hriatpui che u a, dil leh nawr kan ngai vak lovang, tiin a chah.

Chief Minister hian, kumtin lehkhathiam kan pung zel a, sawrkar hna kan hmu vek thei lova. Chuvang chuan skill development lam uar a mahni kea ding thei tura beih te, ram pawn leh state pawna hna hmu thei tura kan inbuatsaih te a pawimawh hle. Thalai skill nei tha te chu kan flagship policy Bana Kaih hmanga thawhpui kan tum a, ka bial chhungah thawhpui tlak thalai tha tak tak awm thei ula a lawmawm hle ang, tiin zirlai kal khawmte a fuih a ni.

Inkhawm hi Nl. Lalawmpuii, THSS Alumni Treasurer in a kaihruai a, Principal Pu H. Lalmawia'n an school chanchin a sawi a. Chief Minister-in an school a tlawh fo avangin lawmthu a sawi a, "vawi tam tak min lo tanpui tawh thin a ni", a ti. Higher Section bik hi kum 2008 khan Adhoc Grant in Aid pek an ni a, High School Section hi kum 2018 ah Lump-sum grant in aid status pek a ni. Tunah hian Higher ah zirlai 138 leh High school ah 92 an nei mek a ni. Tun exam-a first division leh a chunglam mi 28 te hnenah lawmpuina an hlan a ni. Vawiin hian kumin February thlaa pension zirtirtu Pu H. Hrangzuala thlahna an nei nghal bawk.

Chief Minister hi Pu JK Dawngzuala, Chairman, ZIDCO leh Serchhip SP Pu MS Dawngkima, Pi Rebecca Laldinmawii Hrahsel, SDO (Sadar) leh mi pawimawh dangten an tawiawm a ni.