811/2024-2025

Khawzawl, 14th June 2024 : Vawiin khan Khawzawl District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Khawzawl District Bawrhsap Pu K. Lalrohlua hovin Khawzawl DC Meeting Hall-ah an ṭhu khawm.

Thutkhawm kaihruaitu Pu K. Lalrohlua chuan member kalkhawmte lawmna thu sawiin, vawiin DCC, DLRC leh DLSC meeting chu Financial Inclusion chungchang a bik taka ngaihtuahna hun ‘Special Meeting’ a ni tih member kalkhawmte a hriattir a. DCC meeting chu thutkhawm pawimawh tak - District chhunga sum che vel nghawng thei a nih mai bakah mipui hamthatna tura sawrkar ruahmannate tihhlawhtlinna kawngah pawh thil pawimawh tak a ni, a ti a. Kalkhawmte chu mipui aiawh an ni tih in hre reng chunga an ngaihtuahnate seng turin a chah a ni.

He hunah hian Pu Lawmkima, Lead District Manager, DCC, DLRC, DLSC Convener ni bawk chuan rorel thupui tur hrang hrang te sawi hawnna hun a hman hnuah rorel tan a ni.

Vawiin thutkhawm hi a bik taka Financial Inclusion ngaihtuahna tur Special meeting a nih angin thutkhawm hian Financial Inclusion chungchang hrang hrang - Financial Literary Camp Quarterly Report thlirletna hun te, Hmarchhak state-a ATM bun a nih tawh dan te, March 2025 hmaa District zawng zawng 100% Digitize tum a nih thu te, Digital Payment hman tlemna khua tihhmasawn dan tur te leh Telecom Service hmanga Financial Inclusion kalpui dan te thlirhoin an sawiho a. Hei bakah hian Khawzawl District chhunga Financial Inclusion kawnga la hnufual khaw paruk - Aiduzawl, Arro, Khualen, Lungtan, Vanchengpui leh Vankal khuaa hmalak dan tur an rel bawk.

Vawiinah hian thutkhawm danga rel tawh thin - Bank venhimna kaihhnawih leh District chhunga sum chet vel dan te pawh sawi ho a ni.

Vawiin thutkhawmah hian DCC member - Sawrkar department aiawhte, Joint VC, tlawmgai pawl leh District chhunga Bank hrang hrang aiawhte an tel.