812/2024-2025

Khawzawl, 14th June 2024: Deputy Govt Chief Whip, Tuichang bialtu MLA ni bawk Pu W. Chhuanawma chuan vawiin khan Khawzawl Vengthar Branch YMA Golden Jubilee lawmna chu khuallian niin a hman pui.

Khawzawl Vengthar YMA Hall-a Golden Jubilee lawmna inkhawm neihah Pu W. Chhuanawma chuan Khawzawl Vengthar Branch YMA ten Golden Jubilee hmanpuia, khuallian ni tura an sawm chu a lawm thu a sawi a. He huna kalkhawm thalaite chu hmasawn a pawimawh zia hre thar tura a duh thu sawiin, tui tling reng, luangchhuak lo chu a tenawm thuai thin ang bawkin nihna ngaia mi a awm reng chu thil tha lo tak a ni, a ti.

Tuichang bialtu MLA hian hmasawn tur chuan hun awl hman that leh hman dik a ngai a ni, a ti a. Mitinin hun thuhmun darkar 24 theuh an nei a, chu hun hmang thiam te chuan malsawmna an dawng mai thin a ni, a ti. Thil theih leh theih loh danglamna chu mihringte tumruhnaah a awm tih sawiin Pu W. Chhuanawma chuan tumruhna leh thawhrimna chu hlawhtlinna bul pawimawh tak pahnih a ni, a ti a. Hlawhtling tur chuan hloh huama chet (risk) lak tul thu pawh sawiin, hlawhtling tur chuan hlawhchham ngam hmasak a ngai, a ti. Pu W. Chhuanawma chuan zahawmna kawng hi kawng hnai a awm lo a, 1 Thessalonika 4:11-12 thu - “Kan hrilh ang ngei che u khân, phîli ruai lovin, mahni hna ?heuh vuan tlatin, mahni kut ngeiin hna thawk rawh u; tichuan, mite ngaihsân in hlawh ang a, eng mah in tlachham lo vang.” tih chu hre renga rim taka thawk turin kalkhawmte chu a chah a ni.

Jubilee Lawmna programme hi Pu H. Lalrinawma, Vice President, Khawzawl Vengthar Branch YMA chuan a kaihruai a. Pu Lalruatzela Renthlei, Secretary chuan Vengthar Branch YMA chanchin report pein; Pu JH Vanlaltluanga, Branch YMA President; VC, MUP, MHIP leh Electric Branch YMA aiawh ten thu an sawi a. Veng chhung kum upate leh hruaitu hluite chawimawina hun hman a ni a. Zai leh hnam lam hmuhnawm leh ngaihnawm tak tak enho niin, lengkhawm zai leh section kal tam hmanga inelna neih a ni.