813/2024-2025

Aizawl, 14.6.2024: Power & Electricity Minister Pu F Rodingliana chuan nimin (13.6.2024) tlai khan Dawrpui Venga a chenna inah Pi Nandita Garlosa, Assam Power Minister nen an inkawm a. Power sector lamah Mizoram leh Assam bakah North East States dangte intelkhawma, thawhhona tha zawk neih dan turte an sawi dun a ni.

Pu F Rodingliana hian Ministry of New & Renewable Energy, Govt. of India hnuaia Small Hydro Project Incentive Scheme, Central Ministry in State Sorkara tanpuina a pekchhuah thin ennawn tura dah mek chu rang taka Central Cabinet in a pawm theih nan bawhzui dan turte a sawipui a. North East Regional Power Committee (NERPC) intawhkhawm leh hmasak ber ah he Small Hydro Project Incentive Scheme hi sawiho anih a, agenda a telh anih theih nan Chairman, NERPC a nihna anga hmalakpui tura sawmin, NERPC in Central Cabinet pawmpui tura chhawpchhuah anih theih dan turte a sawipui nghal a ni. Pi Nadita Garlosa, Assam Power Minister hian Mizoram Power Minister rawtna chu pawimawh a tih thu sawiin, hmalak ho zel anih tur thu a sawi ve bawk a ni.

Minister pahnihte hian North East States ten kawlphetha siamchhuah kawngah theihna/potential sang tak nei si in, kan la hnufum hle a an hriat thu an sawi dun a, tanlak na tur hrang hrangte an sawidun bawk a ni.

Minister Pu F Rodingliana hian Assam Power Minister hnenah Mizoram in kawlphetha siamchhuah kawnga a thlen chin leh hmachhawp awmte hrilhin, Indian Electricity Act hnuaia dan zam Renewable Purchase Obligation(RPO) pawh Mizoram in a la tihhlawhtlin theihloh avanga kum tin vaibelchhe tel Mizoram in a chawi thin thu hrilhin, he RPO hi Mizoram in a tlin ngei theihnan hydro power project lamah hmalak nasat a tum thu sawiin, hemi kawngah Central Ministry tanpuina tam thei ang ber Mizoram bakah North East States ten an dawn theihnan tangrual a tul thute uar takin a lo hrilh a ni.