614/2025-2026

Thenzawl the 15th May 2025: Vawiin khan Union Minister for Agriculture & Farmers' Welfare Pu Shivraj Singh Chauhan chuan video conference hmangin Thenzawl Horticulture College Academic cum Administrative Building leh College of Veterinary Sciences & Animal Husbandry, Selesih a PG Girls Hostel thar a hawng a. Mizoram Governor General (Dr) Vijay Kumar Singh, PVSM, AVSM, YSM (Retd) chuan a office atangin online in a zawm a, Chief Minister Pu Lalduhoma chuan Thenzawlah a telpui.

Pu Shivraj Singh Chauhan hian Thenzawlah ngei lo kala Horticulture College hmunhma thar te hi hawn tumin ruahmanna a siam a. Tukinah Guwahati leh a chhehvelah khua a nawm loh avangin chawpchilh takin a hmuna rawn kal hi a thulh a. Online Video Conference hmangin chawhnu lam khan a rawn hawng ta zawk a ni.

Thusawiin Pu Shivraj Singh Chauhan chuan, Mizoram chu ram nuam, ram ralmuang leh thlai chi hrang hrang chin theihna ram tha a ni a. Horticulture thlai tharchhuahna hmunpui ni thei khawpa ram tha a ni a. Amaherawh chu tlangram a nih vang te, leilung luangral chak lutuk vang te, kum tin lo neih bansan harsa kan tih vang tein chona lian tak a hmachhawn ve bawk. Heng ka hmaa chona awm te hmachhawna, kuthnathawktuten hlawkna leh hmasawnna ngelnghet an neih theih nan heng college pahnihte hi kan thuam tha zel a ni, a ti. Central sawrkarin Mizoram loneitute leh kuthnathawktute tana hmalakna a neih langsar zual te a tarlang bawk.

Mizoram Larsap, General (Dr) Vijay Kumar Singh, PVSM, AVSM, YSM (Retd) chuan, Mizoram economy chu Agriculture leh a kaihhnawih dangtea innghat tlat a nih thu a sawi a. Mizoram pumpui area 55% chu horticulture hmalak theihna a nih thu leh heng zinga 10% chauh a taka hman tangkai a nih thu sawiin, hmalakna tur tam tak a la awm a, FPO, cooperative, supply chain leh market mumal tak hmangin hmasawnna lian tham kan siam thei a ni, a ti. Thenzawla Horticulture College din a ni chu sawrkar laipuiin horticulture-a Mizoram theihna hriaa hmasawnna nasa zawk nei tura hma a lakna a ni tih sawiin, hei hi 'Atmanirbhar Bharat' leh 'Vikshit Mizoram' ni tura hmalakna pawimawh a ni, a ti a. Organic thlai thar chhuah kawngah tanlak a tul thu sawiin, Mizoram mai nilo khawvel market zau zawk thleng thei tura tanlak tlan a tul thu a sawi bawk.

A hawnna inkhawm hi Horticulture College Campus-ah Chief Minister Pu Lalduhoma, khualzahawm ho va hman a ni a. He hunah hian Chief Minister chuan, Central Agriculture University (CAU) hnuaia zirna in pawimawh pahnih College of Veterinary Sciences & Animal Husbandry, Selesih leh College of Horticulture, Thenzawl te Mizoramin kan kawl a, heng hmun pahnih ten hma an sawn zel a ni tih ka hmuh hian kan lawm a ni. Heng zirna in te hi Mizoram leh India hmarchhak state-te tan mai bakah India ram pum tan pawha zirna hmun hlu a ni.

Mizoramah Horticulture leh Animal Husbandry behchhana eizawng kan tam a, kan farmer te hian hmasawnna tur an la ngah a, horticulture lama hmalak theihna ram te hi kan la ngah hle a. Anni tanpui tur hian kan college pahnihte hian tih theih tam tak an neiin ka hria a. Farmer Outreach programme te pawh uar takin kalpui thin se a lawmawm hle ang.

Mizoram sawrkar pawhin CAU hnuaia college pahnih te hi a ngaihsak hle a, tun hnaiah pawh khan College of Veterinary Sciences & Animal Husbandry-a Pesticide Residue Laboratory dinna tur sum kan pe a ni, a ti.

Hmasawnna thar an neih avangin college pahniha thawktute leh zirlai naupangte a lawmpui a ni.

Dr. Anupam Mishra, Vice Chancellor, Central Agriculture University, Imphal pawhin thusawiin, an University hnuaia zirna pawimawh pahnih College College of Horticulture, Thenzawl leh College of Vety Sciences & Animal Husbandry te kal dan tlangpui leh University hmasawnna hrang hrang te a sawi a. An hmunhma thar hawnsaktu Union Minister te, online hmanga a hawnna hmanpuitu General (Dr) Vijay Kumar Singh (Retd), Mizoram Governor chungah te, a hmun ngeia hmanpuitu Pu Lalduhoma, Chief Minister chungah te an lawm hle tih a sawi a ni.

College of Veterinary Sciences & Animal Husbandry, Selesih-a PG Girls Hostel thar hi zirlai naupang 57 awm theihna tur a ni a. Horticulture College Academic & Administration Building technical details hi Press Release ah hian attached a ni.

COH THZ Admin Rooms.pdf