615/2025-2026

Aizawl dated 15th May 2025: Vawiin chawhma khan Dr. Vanlalthlana, Minister, Information & Public Relations Department chuan Pu Ruata Chawnghlut lehkhabu buatsaih ‘Seven Golden Articles Vol-ii’ chu I&PR Auditorium, Treasury Square-ah a tlangzarh a. He lehkhabu tlangzarhna hun hi Pu C.Laizawna’n kaihruaiin Pu Lalrammawia Ngente chuan lehkhabu chhung thu awm te thlirlawkna hun a hmang a. Pi Elizabeth Chawnghlut chuan lawmhu sawina hun a hmang bawk a ni.

I&PR Minister Dr. Vanlalthlana chuan lehkhabu rotling, thlangtharte thinlunga ram hmangaihna leh ram tan a thahnemngaihna rilru puttir thei tur thuziak tha tak tak chuanna lehkhabu tlangzarh theih a buatsaihtu, Pu Ruata Chawnghlut a lawmpui thu a sawi a. Digital Age-a kan chen mek lai a lehkha phek ngei hmang a thuziak tha tak tak la khawm a, a bu a khawr pum tur hian taimakna leh inpekna thuk tak neih a ngaih thu Minister chuan sawiin, Mizo mipui tan a tha leh tangkai tur thlangchhuak tur phei chuan ram leh hnam hmangaihna thuk tak neih a tul thu a sawi a. Hetiang rilru pu mi, thu leh hla lam a tui mite zingah mi tha tak tak kan nei thin chu lawmawm a tih thu a sawi bawk a ni.

I&PR Minister chuan mizo thu leh hla ziakmite chu an thuziak hmangin mizo zirlai leh thalaite nun kaihruaitu pawimawh tak an nih thu a sawi a. An thuziak hmang hian ram leh hnam hmangaihna chawinun te, khawtlang nuam siam tur a zo nun ze mawi chawisan te leh kan pi leh pute nunzia ziak a vawn nun kawnga thawktu pawimawh tak an nih thu a sawi bawk a ni.

Pu Ruata Chawnghlut buatsaih ‘Seven Golden Articles Vol-ii’ ah hian Article pasarih a awm a. Chungte chu Prof. Darchhawna ziah ‘Mizoram hi ka Ram a ni’, Pu Biakthansanga Khiangte ziah ‘Khawvel Chhanhim Rawh’,  Pu LB Tluanga ziah,’ Bye, Bye! School Run Nuam!’, Pu Thatsavunga ziah,’Ram leh Hnam Humhalh Dan Tur Chu’, Pu Lalremliana Pachuau ziah,’Kan Ram Dinhmun Dik Tak Avangin Ka Mangang’, Dr. KC Lalmalsawmzauva ziah ‘Easternisation’ leh ‘Ram Leilung Fa: Part I & II’ ziaktu; Pu Lalchhanhima, Pu Albert Vanlalruata, Pu joseph Lalzarliana, Pi Lalhlimpuii Pachuau leh Pi Rosaline Varsangzuali te an ni.