2089/2024-2025

Dated Thenzawl, the 17th September, 2024: Vawiin khan Chief Minister Pu Lalduhoma chuan a bial chhung Thenzawla Mizoram Handloom Export Facilitation Hub ah IOT Device Deployment in the state of Mizoram chu a hawng a. Pu F. Rodingliana, Industries Minister chuan a tawiawm.

Thu a sawinaah Chief Minister chuan, mi tam tak eizawnna Mizoram Handloom hian hma a sawn zel a ngai a, sorkar lam a thawktute pawhin nasa leh zuala ke kan pen a ngai. Kalphung tharah Project kawng bo awm lovin, a hmang tangkai tur te hnen thleng ngei zelin hna kan thawk tur a ni. Tin, state dang kan an lohna tam tak a awm a, Project ziaktute pawhin hei hi hriaa, kan hnam leh kan mite mila project ziah thiam a pawimawh. ZOHANDCO pawh tih chak zel a tul. NEHHDC leh agency dang kan tana tangkai turte kuangkuah chungin kan kal zel dawn nia.

Thenzawl leh a chhehvela puantahtute hian puantahin ei an zawng a ni satliah lova, an puantahah hian kan culture leh kan nihphung an tah tel a, kan hnam tih phung anga puan an tah naah Technology tha zawk a rawn inrawlh lut thei hi a ropui a ni. Kawng thui tak kal tur erawh kan la nei. Kan mamawh ang taka duan Yarn Bank te kan la mamawh a. Yarn tha ber chi kan tah theih te a tha hle. Tin, kan thalaite Fashion Designing ah an sang viau a, lehkhathiam thalai rualte nen tang hovin export lam tih dan te zir ni ta sela, weavers te tan hian Designer tha tak tak awm bawk sela, PUAN ang chauh ni lo deuh a, product dang tam tak nen khawvel market kan hmachhawn theih hun tur hi ka nghakhlel a ni. Weaver te pawhin, natural yarn- Silk leh cotton tah chhuah lamah hmasawn lo tum ula, Sericulture Department nen tangkawpin silk product pawh nasa zawk kan siam chhuak thei ngei tur a ni, tiin official leh puantahtute a chah a ni.

Pu F. Rodingliana, Industries Minister pawhin thusawiin, Mizoram hian Industrial Policy tha tak kan nei a, chutah chuan Subsidy scheme tha tak tak a awm. Heng kan scheme neih te hi Industry neituten rawn hmang tangkai turin ka sawm che u a. Cluster development ang zawnga hmalak uar deuh deuh te hi kan tum a ni. Mizote hi hnam mawl kan nih lohzia chu Puan nalh tak tak tah thiam kan nihna hian a tifiah. He thiamna ril leh hlu tak hi kan vawn that a, kan uar zel a ngai a ni, a ti. Industry sawi a pianga rilrua lang nghal chu power supply a ni a. Power lama hmalakna hi kan tluan chuan kumin kum tawp lamah hna kan tan thei hial mai thei, tiin power siam kawnga sawrkar inbuatsaih dan a tarlang bawk.

Inkhawm hi Dr. Lalzirmawia Chhangte, IAS, Secretary, Commerce & Industry chuan a kaihruai a, Pu Neeraj Kumar, Manager, NEHHDC chuan an device kalpui chanchin sawifiahna a nei. Khawvel hmaa India hmarchhak hnam te nunphung leh zia venhimna leh phochhuahna a ni a. Sum leh pai hmuhna hnara hmang chungin heng kan hnamzia leh tihdan te, kan incheina te zau zawka tarlanna a ni, internet kal tlanga zawrh chhuahna remchang a siam bawk, a ti a. Handloom & handicraft lamah Mizoram chuan hmabak eng tak a nei a, hei hi nasa zawka chawikan zel kan duh a ni, a ti.

Pi Maria CT Zuali, IAS, Director, Commerce & Industries leh Pi R. Lalrodingi, OSD to CM & Director of Tourism te pawhin thusawina hun an hmang bawk.

Vawiina hawn IOT Device hi internet thiamna hmang tangkaia Puan leituten an puan lei chanchin awlsam taka an hriat theihna tur hmalakna a ni a. An puantahah QR code a awm ang a, han scan khan a tahtute, a tahna hmun leh thil pawimawh dang awlsam takin a en theih a ni. Sum hi North Eastern Council, MDoNER, Government of India atanga sanctioned niin, Project thawktu te hi MDoNER Corporation, North East Handicrafts and Handloom Corporation, Guwahati an ni.