2090/2024-2025

Dated Lawngtlai, 17th September 2024: Vawiin chawhma dar 11 khan District Hub for Empowerment of Women (DHEW) Women & Child Development Department Lawngtlai District hmalaknain 'District Level Implementing Committee on Mission Shakti' chuan an Chairman Pu Cheemala Siva Gopal Reddy, IAS, District bawrhsap nibawk kaihruaiin DC Conference Hall- ah thutkhawm an nei.

Pu Cheemala Siva Gopal Reddy chuan 'Mission Shakti' hnuaia line department hrang hrang leh hmeichhiate dikna chanvo humhalha theihtawpa thawk thin Tlawmngai Pawl lo kal te hnenah lawmthu sawina a nei a. Hmeichhe baihvai, harsatna tawk, tlukluhna leh belh tur mumal nei lote bakah hleilenna tuar leh belh tur mumal neilo te tanpui hi sawrkar department pakhat kutah daih mai chi a ni lo a, department hrang hrang bakah Tlawmngai Pawl, Kohhran leh mipuite mawhphurhna a ni tih hriat thar a tul hle a ti. Hmeichhiate zingah inchhungkhura tihduhdah, tharum thawhna leh hleilenna tuar an tam hle nia a hriat thu tarlangin bawrhsap chuan chhungkaw nuam leh entawntlak ni turin mipate pawhin theihtawp chhuaha tan lak thar a ngai a ni, a ti.

Bawrhsap chuan hmeichhia harsatna tawkte tanpui turin sawrkarin ruahmanna tam tak a siam tih a sawi a. Beti Bachao Beti Padhai (BBBP) hnuaih hmeichhe naupang zirna tih hmasawn niin, mipa leh hmeichhiate intluktlanna leh an dikna chanvo humhalh a nih thu sawiin Pu Cheemala Siva Gopal Reddy chuan One Stop Centre (OSC) leh Women Help Line ( 181- toll free, 24x7) kaltlangin hmeichhia harsatna tawkte tan tanpuina kalpui reng a ni tih tarlangin, chenna mumal nei lo leh hleilenna tuarte tan 'Shakti Sadan' tha taka kalpui mek a nih thu a tarlang bawk a. Hmeichhiate dinhmun hre chianga harsatna an tawh kawngah theih tawp chhuaha tanpui thin turin Sawrkar department hrang hrangte tan la thar turin a chah a. Pu Cheemala Siva Gopal Reddy chuan Tlawmngai Pawl, Kohhran leh Lawngtlai mipuite thahnem ngai taka thawhpui tura sawmin; chanchinthar thehdarhtute pawh hmeichhia harsatna tawkte tana sawrkarin tanpuina a siam ang angte bakah, a bik takin Women and child Development Department -ten 'Pamphlet' tha tak an siam chu mipuite hnena zau zawk a thehdarh thin turin a ngen nghal bawk.

Pi F. Lalengvari, District Mission Co-ordinator, DHEW chuan Lawngtlai District- a Mission Shakti kalpui dan tlangpui sawina a nei a. Mission Shakti chu thuang lian pahnih - Sambal ( Safety and Security) leh Samarthya ( Empowerment) ah then niin, Sambal hnuaiah hian Women Helpline, Beti Bachao Beti Padhao ( BBBP), One Stop Centre, Nari Adalat kalpui niin, Samarthya hnuaiah hian Sankalp-HEW, Sakhi Niwas, Palna, PMMY leh Shakti Sadan- te kalpui mek ni, a ti. One Stop Centre leh Women Help Line- kal tlangin mi-129 hnenah tanpuina pek tawh niin, Shakti Sadan ah hian mi -275 enkawl tawh ni bawkin, Palna Creche (pre- school education) hnuaiah naupang kum 3-6 inkar mi -450 enkawl mek an nih thu a tarlang bawk.

District Level Implementing Committee on Mission Shakti- thutkhawmah hian thu pawimawh hrang hrang sawiho a ni a. Mission Shakti chu Lawngtlai District- ah hlawhtling taka kalpui a nih theih nan 'Line Department' zawng zawngten mahni zawnah theuh theihtawp chhuah ni se, Tlawmngai Pawl, VC leh Kohhrante pawh thawhpui tura sawm leh ngen ni se an ti a. Pradhan Mantri Matru Vandana Yojana (PMMVY) - Fatir naupai leh naupawmte hnena hawmthatna pek thin chu chakzawka kalpui ni se, mi tam zawkin he Scheme an chhawr tangkai theih nan DHEW ten September thla chhunga Block Level an tlawh hunah department hrang hrangten hma lo lakpuiin tawiawm ni se an ti. Sawrkarin Hmeichhiate dikna chanvo hrang hrang a siam leh dan kaltlanga tanpuina mamawhte tan 'Legal Aid Clinic' buatsaih ni se, hemi atan hian District Legal Services Authority (DLSA) nen thawhho ni se an ti.

Vawiin 'District Level Implementing Committee on Mission Shakti' thutkhawmah hian Line Department hrang hrang aiawh leh NGO an tel thei a, Pu C. Lalnunfela, DPO, WCD chuan lawmthu sawika neiin hun a khar.