Chief Minister Pu Lal Thanhawla chuan vawiin tlai khan Aizawl chhim lam 42 Km hla, Thiak khuaah Horticulture Centre a hawng.

Hawnna thu a sawiah Chief Minister chuan horticulture centre hi hmasawnna kailawn leh intodelhna rahbi pawimawh tak a ni a ti a. Hnam changkang leh hnam zahawm ni tur chuan intodelh angai a, chumi tur chuan thuawi’h tak leh tih nuam taka awm a, rinawmna, taimakna, dikna leh Pathian tihna nen kan kal angai a ni a ti a. A pawimawh hmasa ber chu kuthnathawktu, loneimi, mirethei leh chanhai ten lei rem an rah hi a ni a, hemi tipuitling tur hian NLUP kalpui a ni a ti. A hlawhtlinna tak tak erawhchu a dawngtute kutah a innghat a ni tiin, a kaihruaitu tura ruat, sorkar hnathawk te pawh tha thei ber tura hna an thawh theih nan zalenna zau tak pek an ni a ti.

Chief Minister hian lehkhabu ‘Horticulture hmasawnna duhawm’ tih a tlangzarh bawk.

Khualzahawm Pu R.Romawia, Speaker chuan horticulture centre hawn tak hian kan ramin hma a sawn chhoh chakzia a tilang a ni a ti. 

Thiak khawtlang hruaitu ten Horticulue Department hnena ram hectare 17 a zau an pek, Horticulture Centre hi kum 2010 atanga hmalak tan a ni a. Tunah hian Nursery, High Tech Green House leh Shade House tam tak bun tawh a ni a. Beneficiary 90 te hnenah horticulture technology hrang hrang hmanga thlai chin tir an ni a.Kuthnathawktu ten technology thar an zirna hmunpui ni tur leh Horticulture College, Mizorama kan neih mai tur tana hmun pawimawh tak tur, loneitute mamawh thlai leh thei chi hrang hrang chin tur hrisel tha leh thar hma tur pek chhuah theihna tura ruahman a ni.

Horticulture Centre ah hian staff quarters 4, office 1, kudam 1 leh labor shed cum store room 3 sak ani bawk a ni.

Horticulture Centre huam chhungah hian ‘Integrated Hi-Tech Green House for Hydroponics Cultivation’ Israel techno;ogy hmanga din chu Speaker Pu R.Romawia’n a hawng a. Hei hi lei tel lova thlai chinna technology thar ber hmanna tur a ni. Pu K.S.Thanga, Parliamentary Secretary for Horticulture pawhin thlai leh thei 3.36 tonne dah theihna tur Packing & Cooling House a hawng bawk a, Pu R.Lalzirliana, Home Minister in Centre Office a hawng bawk a ni.

Hawnna inkhawm hi Horticulture Minister Pu H.Liansailova’n a kaihruai a, Ministers, Parliamentary Secretaries leh MLA te an kal tha hle a ni.

Attachment

  • Loading attachment...