Hawla Indoor stadium-ah tukin dar 8:00 khan Sports Minister Pu Zodintluanga chuan NE Games,2013,Imphal-a neih tura Mizoram Contingent a vailiam.

Mizoram Contingent thlahna hun tawi, Pu C.Laltlanthanga, Secretary, Mizoram State Sports Council kaihhruaiah hian Sports Minister Pu Zodintluanga chuan thu sawiin, Mizoram aiawha fehchhuak turte chu medal an la emaw, la lo emaw, 2016 Rio Olympics thlir chunga hmarchhak huap inelna hmachhawn turin a fuih a, khawi hmunah pawh awm se Mizo infiammi an nihna, disipcipline nei tak chunga awm turin a chah bawk.

Dt.8-11, April, 2013 chhunga Imphal, Manipur-a NE Games 2013 neih turah hian Mizoram chuan players mipa 97 leh hmeichhia 91, an vaiin players 188 a tir a, official mipa 16 leh hmeichhia 4 te nen an vaiin Mizoram contingent hi mi 208 an ni a. Mizoram Contingent te hi hlawm hnihah chhuakin, vawiinah contingent hmahruai mi 100 ten Imphal an pan phawt ang a, naktuk zingah a dang an chhuak leh ang. NE Games hmachhawn tur Mizoram Contingent fehchhuak hmasate hi Sumo motor 10 hmangin an chhuak a, Aizawl atangin Ngopa kawng (road)-ah, Manipur panin Sinzawl-ah an riak ang a, chuta tang chuan Imphal an lut ang.

Sports Minister Pu Zodintluanga hian vawiin vek khan Aquatics Complex, ITI venga International Standard Swimming & Diving Pool tur siam mek a tlawh nghal a, hmalak dan enfiah a. Tun dinhmunah Swimming Pool tur bik, a dung metre 50, a vang metre 25 chu laih zawh thawkhat a ni tawh a, chak takin hmalakna a kal chho zel a ni.

Attachment

  • Loading attachment...