Aizawl City Bus Owners Association (ACBOA) General Assembly vawi 40-na vawiina Synod Conference Centre a neih chu Transport Minister Pu PC Zoram Sangliana’n a hmanpui.

Minister chuan ram chhung state dangte nena khai khin ralah Mizoram chu naupangin hnufual rih mahse Public Transport chung changah India ramah a ti tha ber pawl ni a a hriat thu te; State dang ten an tih ve theih loh taxi, bus leh maxi cab ten rawng mumal tak an nei a; lirthei ke pahnih nei khalhtute zingah helmet khum lo leh pahnih aia tam inphur hmuh tur an vang hle te chu lawmawm a tih thu te a sawi a. A hlawhtlinna chu Public Transport neitu te, a enkawltu Driver leh mipuite thuawih vang a ni, Pu PC Zoram Sangliana chuan a ti. ACBOA hruaitute chu Aizawl khawpui tawt lutuk a ziaawm theih nan te leh transport-in hma a sawn theih nan finchhuah zel tura a sawm rualin phai rama an tih thin anga City Bus ten ticket system hmang ve tawh se a duh thu Minister chuan a sawi a. Bus Fare Rate chung changa sorkar an ngenna pawh hriain State Transport Authority thutkhawm leh hmasak berah ngaihtuah a nih tur thu kalkhawm te a hrilh a ni.

Minister Pu PC Zoram Sangliana chuan kum kalta a Delhi khawpuia hmeichhe pakhat chunga thil rapthlak tak thlengin a nghawng kal zelah Bus chhunga thil tisual an awm pawha awlsam taka zawnchhuah theih nanAudio-visual Passenger Information System vuah te, Bus chhunga a ruka Camera dah te, Global Positioning System (GPS) vuah te leh hmanraw changkang chi hrang hrang Public Transport a vuah tura sorkar laipuiin hma a lak mek dan te a sawi a. Mizoramah ngei pawh tih ve a tul hun a la thleng dawn tiin Transport Minister chuan Public Transport neitute lo inkau lawk turin a ngen nghal bawk.

Assembly hi an President Pu Malsawmtluanga’n a kaihruai a, chawhnu lamah rorel inkhawm an hmang zui nghal a ni.