Pu Lal Thanzara, Parliamentary Secretary to Chief Minister chuan nizan khan YMA Buarpui Group, Conference vawi 23-na chu Dengsur-ah a hmanpui a. Group Conference hi April ni 2 khan tan niin nizan khan a tiak a ni.

Pu Lal Thanzara chuan YMA chu Pathian rawn chunga din a nih vangin leh a thil tum pakhat chu Kristian nun tha ngaihsan anih avang in YMA chuan Pathian malsawmna nasa takin a dawng thu a sawi a. Ram leh Hnam humhalh chungchang sawiin Ram leh Hnam hmangaih a, humhalh tlat tih awmzia pawimawh tak chu Ram chu Lalpa ta a ni tih leh keini hi a enkawl tura a tih kan ni tih kan hriat leh kan pawm hi a ni, a ti a. Ram leh Hnam hmangaiha humhalh tur chuan Josefa anga mi rinawm, Davida anga Lalpa ta anih hriatpui ngam leh Nehemia anga siamthat duh tak tak a, a taka thawktu nih a tul a. Kan mihringpui te leh Pathian thilsiam tinreng te hmangaih taka kan enkawl hian kan Ram kan hmangaihzia alo lang anga, tih chhiat tum tute lakah kan humhim tlat tur a ni a, a ti bawk.

Pu Lal Thanzara chuan ram leh hnam humhalh kawngah hian khawpui a ni emaw, zokhua a ni emaw, Mizo thalai te kan taimak a pawimawh a, hnam dangte thawh ang kan thawk hreh tur a nilo a, hna thawh tur an hmuh loh nan hna kan thawhkhalh a ngai a ni, a ti bawk. CYMA bultumin CADS-in hma nasa takin a lak thusawiin an hmalakna avangin thalai tihchhiat a awm thei te chu ven in an awm tiin YMA member kalkhawmte chu ruihtheih thil leh zuk leh hmuam lakah te fihlim turin a chah bawk a ni. Tlawmngaihna leh Zo nunmawi ze tha hrang hrang te che chu chawinung a, mahni nun a nunpui turin a fuih a. Serchhip-Thenzawl-Buarpui kawng laih zau hna, Asian Development Bank tanpuina hmanga thawh tur chu a contractor than fel anih tawh thu leh hna hi kumin June thlaah a bultan beisei a nih thu te a sawi bawk.

Parliamentary Secretary hian Conference chhunga YMA Branch hrang hrang te inkara inelnaah a titha te hnenah lawmman a hlan bawk. CYMA General Secretary Pu Vanlalruata pawhin thu a sawi a ni.

YMA Buarpui Group hnuaia hian YMA Branch 7 a awm mek a, chungte chu, Buarpui Branch, Bungtlang West Branch, Changpui Branch, Dampui Branch, New Khawlek Branch, Dengsur Branch leh Kawlhawk Branch te an ni a, member 1376 an awm mek bawk a ni.