Pu John Siamkunga, MLA South Tuipui chuan nimin khan Hnahthial Group YMA Conference vawi 25-na Bazar Building-a neih chu khuallian niin a hmanpui.

He hun Lalruata Khiangte, Vice President, Group YMA kaihhruai-ah hian thu sawiin khuallian Pu John Siamkunga chuan he hun a hmang thei chu lawmawm a tih thu te, South Tuipui bial-a khaw hrang hrang inelna tur Football Tournament ropui tak siam a nih tur thu te, kumthar-ah chuan Hnahthial-ah ngei Chapchar Kut pawh ropui taka hman a nih theih nana hma a lak thu te, a bial chhungah YMA Group pathum a awm thu leh conference senso atan Rs. 50,000/- theuh a pek thu a sawi a ni. Pu John Siamkunga chuan World Bank kawng tlang avanga kan harsatna tawh te sawiin hei hian nasa takin keimah-ah tanna min pe a, tunah hian Champhai tlangdung kalpawhna tur S. Chawngtui kawng kan laitlang tawh a, Thingsai-ah cheng vaibelchhe 8 sengin Border Trade siam a ni dawn bawk a, Haulawng kawng lai tura hmalak chhoh mek niin Kolodyne Multi Modal Transport Project pawh turin Rihte ruam-ah double lane kawng a tlang dawn bawk a, heng zawng zawng hi tihpuitlin a nih hunah chuan Hnahthial khawpui hi Sumdawnna khawpui-ah kan siam leh dawn a ni, a ti bawk.

Pu John Siamkunga chuan nakin lawkah TV-a kan hmuh thin Thai te, Korean te leh khawchhak ram mi tam takin kan ram hi an rawn lut dawn a, tun-a YMA kumpuan ‘Ram leh Hnam humhalh’ tih hi kan vawn nun reng a ngai dawn a, economic hmanga chimrala kan awm lohna turin tun atang hian inbuatsaih ila, taima tak leh rinawm takin kan hmaa chhuak hna te hi thawh hreh nei lovin i thawk thin ang u, tiin YMA member kalkhawmte a chah a ni.