817/2023-2024

June ni 16, 2023: Chief Minister Pu Zoramthanga chuan nizan (15th June, 2023) khan YMA Thuampui Branch te'n YMA Day 88-na, Thuampui Rajat Auditorium-a buatsaih chu khuallian niin a hmanpui.

Chief Minister chuan YMA Day tha taka ram puma lawm a ni thei chu lawmawm tiin kalkhawmte chibai a buk a. YMA chu Mizo khawtlang nun a langsar berte zing a mi leh hna pawimawh tak thawk a nih thu a sawi. Chief Minister chuan YMA thupui Ram leh Hnam Humhalh chu tunhnai kan hun tawnah pawimawh lehzual a tih thu a sawi a. Rambuai avanga ram leh state thenawm atanga kan unau chengte rawn raltlan engemawzat awmte theihtawpa lo tuamhlawm chu kan tih awm reng a ni tiin YMA in raltlante chhawmdawl kawnga hma a lakna te chu lawmawm a tih thu a sawi. Chief Minister chuan Mizoram chu hman kan pi leh pu te khawchhak atanga lo thlangthla te'n an awm nghehna tur atana an thlan a nih dan sawiin, a bulhnai ram dangte nen khaikhin chuan ram remlo leh thlanawmloh zawk emaw a ngaih theih na chen pawh awm mahse, chhan nei a helai hmunah hian awm tura din kan ni, tiin kan la nih theih leh hmasawn theihna te hre reng chungin kawng engkimah theihtawp chhuah tlang a, kan nitin nunah ram leh hnam humhalh hi vawng tlang theuh bawk turin kalkhawmte a sawm a ni.

Nizan YMA Day hmanna inkhawmah hian Pu Chalhmingthanga, Joint Director, BRO Project Pushpak chu khualzahawm niin thu a sawi bawk a. Zai leh hlado chham intihsiakna te a hun hman niin, vengchhung map tlangzarh a nih bakah YMA sports a section tithate hnenah lawmman sem a ni bawk.