Assam Rifles ten inunauna leh inlaichinna tha zawk a awm thei nana ‘Friends of the Hill People Expedition for Peace’ tia an buatsaih mek chu nimin tlai khan Chief Minister Pu Lal Thanhawla’n Lammual ah ‘Flag In’ in a lawmlut a, Inspector General Assam Rifles (East) Maj. Gen. MV Chandran leh Brig. MS Mokha, DIG, HQ 23 Sector Assam Rifles ten Chief Minister hi an tawiawm a. He programme ah hian Legislative Assembly Speaker Pu Hiphei, Health Minister leh MFA President ni bawk Pu Lal Thanzara leh MLA thenkhate an tel bawk a ni.

Chief Minister Pu Lal Thanhawla chuan Assam Rifles ten Chhim tawp Parva atanga bultan a tlang mite nen in thian thatna thupui neia ‘Friends of the Hill People Expedition for Peace’ an buatsaih mek hi thil tha tak, kan inlaichinna sawhngheh zel theihna thil ropui a ni, a ti a. Mizo te hian Assam Rifles, a bik takin 1st Assam Rifles hun rei tak Aizawla hmunpui neite nen inzawmna leh inunauna tha tak kan nei a, he kan inthianthatna hi chhawmnun zel a nih ka beisei, a ti a. Assam Rifles ten Mizoram leh Mizo mipuite kawng hrang hranga an puihna leh an rawngbawl sakna ah lawmthu sawiin a bik takin kan thalai te Sipaia an luh theihna atana min puihna te leh hmun kilkhawr deuh deuha Medical Camp an buatsaih thin te hi kan chhawr hle a, lawmthu ka sawi a ni, a ti.

He hun hi remchang a la in, nimin tlai khan Assam Rifles Football Team leh Bethlehem Football Club ten Friendly Match an khel a ni.

Assam Rifles chuan Mizoram mipuite nena inlaichinna tha zawk an neih theih nana an buatsaih ‘Friends of the Hill People for Peace Expedition’ chu kalpui mek a ni a, October ni 18 khan Seling atanga Zokhawsang thleng intlansiakna ‘Motor Cycle-cum-Gypsy Expedition’ an huaihawt a. Hei bakah hian Aizawl leh a chhehvela tlawmngai pawl hrang hrang leh mipuite nena thawk hovin faina lam inzirtirna ‘Swachh Bharat Abhiya’ te, thing leh mau leh nungcha humhalh chungchang inzirtirna ‘Go Green Drive’ leh Zokhawsang-ah Tug of War leh Volleyball Match an buatsaih bawk a. Assam Rifles expedition-ah hian mi 600 chuang telin, intihhlimna chi hrang hrang leh mipuite tan ruai buatsaih a ni bawk.

‘Tlangmite Thian Expedition’ hi 39 Assam Rifles atangin Officer 2, JCO 1 leh sipai 17 ten an kaihruai a, he Expediton hi Headquarters IGAR (East) and Headquarters 23 Sector Assam Rifles tangkawp hmalakna a ni a. October ni 18 vek khan Zokhawsang-a sikul naupangte nen inkawmin career awareness programme an hmanpui zawhah khawtlang hruaituten he Expedition Aizawl lama pan tur an vailiam nghal a ni.

AR Peace Expedition Team Aizawl lo lut tur chu Thuampui-ah Aizawl Thunders ten lo hmuakin nimin tlai khan AR Lammual-ah Inspector General Assam Rifles (East) Major General MV Chandran, YSM, SM hovin lo hmuah a ni a; Chief Minister Pu Lal Thanhawla’n a vailut a ni.