Vawiin tlai khan Department of Food, Civil Supplies & Consumer Affairs Minister Pu John Rotluangliana leh FCS&CA Secretary Dr. Franklin Laltinkhuma hovin Indian Oil Corporation Limited (IOCL) hotute chuan Secretariat Conference Hall, New Capital Complex, Khatla ah Mizoram LPG harsatna tawh mek sutkian dan tur sawiin an thukhawm. He hunah hian FCS&CA Department officer-te bakah Central Y.M.A, Consumers Union leh Gas Distributor-te an tel a. IOCL hi India hmarchhak a an hotu lu ber Executive Director Pu Dipankar Roy leh Pu Bimal Pathak, Chief LPG Manager -ten an ho a ni.
Minister Pu John Rotluangliana chuan sawihawnna neiin, Mizorama eirawngbawlna gas harsatna kan tawh mek sukiang tura IOCL hotute an lo kal chu lawmawm a tih thu sawiin, a rang thei ang bera hmalak a beisei thu a sawi a. FCS&CA Department Secretary chuan Power Point hmangin Mizorama LPG sem chungchanga harsatna hrang hrang mipuiin an tawh te, heng harsatna a thlen chhan leh, a chinfel theih dan tur te a tarlang a. Distributor leh Consumer Union leh YMA lam atanga harsatna an tawhte pawh thlen a ni bawk.
Mizoram Sorkarin carrying contractor ten gas an phur that duhloh avangin leh contract chhangtu inhnukdawk an awm avanga indaihlohna awm phuhruk tura distributor ten anmahni truck hmanga phurh mai theih nise tia rawtna a siam chu IOCL hotute chuan tha an tihpui a. IOCL danah LPG phurhna truck reng reng ah lirthei thlen chin hriat nana chhuina – Vehicle Tracking System (VTS) leh accident tawh palh laka venhimna chikhat Anti-lock Braking System (ABS) chu vuah ngei tur a ni a. LPG Distributor ten an truck-a heng khawl an vuah chhung hian Mizoram Sorkarin Gas phurh hna hi a thawk ang a. Chumi hnu ah Distributor-te hian an phur chhunzawm dawn a ni. IOCL hotute chuan Distributor-te tan hian ABS vuah lovin thla khat chhung LPG phurh an remtih sak theih thu sawiin, VTS erawh an vuah nghal ngei a ngai thung a. IOCL hotute hian an tracking system hmanga truck tlan dan leh an thlen chin chhui phalna Mizoram Sorkar pek an remti bawk.
Meeting-ah hian October thla chhunga nitin gas cylinder truck 18 khat lo thleng thei se tia thlen chu IOCL hotute chuan tihhlawhtlin an tum thu an sawi a. Gas harsatna thlen chhan lian tak, cylinder an tihchingpen theih tawhloh avanga Mualkhang Bottling Plant atanga LPG phurtu transporter tlan duhlo te chu vawi hnih “show cause notice” an pek tawh thu IOCL hotute hian tarlang bawkin, naktuk (20.10.2016) hian Mualkhang plant-ah ngei tender chhangtu transporter-te chu an hmuh leh tur thu leh, contract an ziah ang ngeia gas an phur chhunzawm duhlo anih chuan an contract chu tihtawpsak an nih tur thu an sawi a. Contract hi a tawp chuan a aiawh tur tender chhuah that leh a ni ang.
FCS&CA Secretary chuan India ram State changkang zawk ten Refill/Advance booking an ti tawh chu Mizorama kalpui anih theih nan LPG dinhmun tiziaawm tura IOC hotu te chu November leh December chhunga thla tin cylinder 1,50,000 supply thei tura a ngenna chu tihhlawhtlin an tum thu anni hian an sawi a. A phurtu turte lamah fellohna engmawh a awmloh chuan nakum January chawhnu lamah chuan refill booking-ah LPG consumer-te an insawn thei tawh dawn a ni. Refill booking hnuaiah hian Internet emaw Mobile Phone emaw hmangin distributor-te hnenah mipuiin gas an mamawh chuan an order thei mai tawh dawn a. He kalphung hi a thatna chu booking ti zawng zawng te distributor ten an pek theih loh chuan an ‘fail’ zat percentage hi website atangin IOC hotu ten an hmu thei dawn a. Distributor ten an fail nasat chuan, IOC Headquarters lam atangin an chhui vat mai dawn a ni.
Tun dinhmun ah chuan refill booking kalpui a la nih loh avangin gas hasatna pawh hi IOC hotu ten an website atang ringawt chuan an hre thei lo a ni. Tun hnaia eirawngbawl gas harsatna tiziaawm tur hian Mizoram Sorkar in IOC leh Ministry of Petroleum a nawr hnu in, kar hmasa atang khan ziaawm lam a pan chho tan a.
Vawiin meeting-ah hian LPG bakah kerosene supply zat tih tam thu leh, District capital tinah leh sub-division tina gas distributor dah belh mamawhna te IOCL hotute hnenah hian thlen a ni bawk.
