Vawiin chawhnu khan Lunglei Ramthar Veng YMA Hall-ah Ramthar Handloom Cluster hnuaia puantah zirchhuak 89-te hnenah pawnbu (loom) leh accessory semna neih a ni a. Commerce and Industries Parliamentary Secretary Pu Joseph Lalhimpuia chu Khuallian a ni.

Pu Joseph Lalhimpuia chuan Ramthar Handloom Cluster hnuaia puahtah zirchhuak te chu workshed sak nan tanpuina cheng 26,000 theuh pek an ni tawh a, pawnbu (loom) pakhat theuh leh accessory hrang hrang pek an nih leh tur thu a sawi. Ramthar Cluster hlawhtlinna chu puantah zirchhuak te kutah a innghat tiin, puantah atanga sum an thawhchhuah chu sawrkarin cheng khat pawh a beisei loh avangin, thahnemngai a chhungkaw eizawnna tlak a hmang turin a chah a ni.

Parliamentary Secretary chuan Ramthar Veng YMA Hall chu tidanglama, inhnuaia puan bahna hmun tur leh inchunga badminton court pahnih dah tura ruahmanna a awm thu a sawi a. NLUP leh Industries Department tangkawpin Lunglei DIC Office-a Emporium an siam mek thu a sawi bawk.

Pu Chalrosanga Ralte pawhin a bial chhunga hetiang Cluster nei ve thei turin tan nasa tak an lak thu sawiin, Lunglei East bial mipui chu an awhawm in an vanneih hle a ti a, lawm nachang hre turin a chah a ni. Bialtu MLA in thahnem a ngaih anga, an bungraw dawn te chu eizawnna atan chhawr tangkai a, ti riral mai mai lo turin a chah bawk a ni.

Pawnbu leh accessory semna inkhawm hi Pu Lalhrilliana, Functionla Manager in a kaihruai a, Pi Hunthianghlimi, Extension Officer (H) chuan technical report pe in, Ramthar Handloom Cluster hnuaiah ISDS kaltlangin mi 89-te hnenah thla 4 chhung puantah zirtirna an neih thu a sawi. Pu Lalhmunsiama, General Manager, DIC, Lunglei in lawmthu sawina in hun a khar a ni.