Tlawmngai pawlte hnathawhna chak zawka an kal theih nana an thiamna te tihpuna, pawl chak an nih theihna tura seminar, ‘ Harnessing the strength of the Voluntary Sector for enhancing delivery capabilities’ tih, India Habitat Centre and DevPro, New Delhi leh Mizoram sorkar Social Welfare Department tangkawpin a ni 5 ( 11th - 15th Oct 2011) chhung awh tur I&PR Conference Hall-a an buatsaih chu vawiin khan Chief Minister Pu Lal Thanhawla chuan a hmanpui.

Chief Minister chuan tlawmngai pawlte tih chak nana New Delhi lam atanga hetiang seminar pawimawh tak, Mizoram tana a hmasa ber buatsaih a ni chu lawmawm a tih thu a sawi a. NGO kan tih, Non Governmental Organisation hi sorkar emaw sorkar aiawh emaw tel ve lohna pawl anih thu sawiin, Chief Minister chuan Tlawmngai Pawl, Voluntary Organisation hi chu eng pawl pawh, mihring inpekna hmanga thil tum an neihte hlen tumtu an ni a ti a. Chuvangin tlawmngai pawl zawng zawng hi NGO an ni vek kher lova; chutiangin NGO zawng zawng hi tlawmngai pawl an ni vek kher bawk lo, hlawh neia chhawr an awm thei a ni a ti. Mizoramah chuan kan hman pawlh vek a ni tiin, YMA hi tlawmnagi pawl lian ber a ni a, NGO ti te pawhin kan hmang bawk thin a ni a ti.

Chief Minister chuan NGO te leh sorkar inlaichin dan a zirin, an hmasawn dan a inanglo thei a ni a ti a. India ram hi mipuite hamthatna tur siam saktu, Welfare State kan nih angin programme tam tak hi NGO ten an kengkawh thei a ni a ti a. Technology thang chak tak avang hian engkim mai hi langtlang tur a ni ta a; hei hi keini pawh ina kan duh ber, langtlang leh mawh la ngam sorkar nih hi, kan la kal dik hle in ka hria, a ti a ni.Chief Minister chuan Mizote hi hnam tlem, inpawh tak leh intluktlang hnam kan nihna hian NGO tan nasa taka hnathawhna a inhawng a ni a ti.Thil pawimawh tak mai chu sorkar leh NGO te inlaichinna tha a awm hi a ni, a ti a; Mizoram chu hemi lamah chuan kan vannei hle a ni a ti. Chutih laiin, kan thawhho zelna tur kan hriatchian a pawimawh hle a ni a ti bawk.

Seminar hian a tum ber te chu NGO zirtirna pek a, an finna leh thiamna te tuaihriamin, an hnathawhna chawikang a, pawl chak leh tha a siam a ni a. Seminar hi Course neia kalpui tur a ni a, chuvangin training pawh hunbi neia pek tur a ni. Tun tuma ni 5 chhung seminar hi Course 1 na a ni dawn a, Course 2 na chu November 8th - 12th 2011 ah chhunzawm leh a ni ang. Seminar hawnna hi Social Welfare Director Pi Vanlaldini’n a kaihruai a. India Habitat Centre, New Delhi a Director Raj Liberman pawhin thusawina hun a nei bawk a. Pu PC Lalthanliana, Minister of State for Social Welfare pawhin hun hi a hmanpui a ni.