Chief Minister Pu Lal Thanhawla chuan vawiin khan New Serchhip YMA Hall-a Workshop on ‘Tuihna Humhalh Beihpui’ tih, Serchhip Sub Hqrs YMA leh PHED tangkawp in a buatsaih chu a hmanpui.

Chief Minister chuan tuihna siamtu chu thing leh mau, ramngaw a ni a, amaherawhchu kan tlangram lo neih avang leh ramngaw kan tihchhiat nasat avangin kan tuihna te hi a kang chah phah nasa a ni a ti a. Hetianga kan kal reng chuan tuchhuan lokal leh zel turte tan thlaler kan siam sak mai ang tih a hlauhawm a ni a ti. Rajasthana thlaler pawh khu tunhma chuan tlangram lo neihna thin ani tih mithiam ten an sawi a ni a ti a. Chuvangin tuihna humhalh beihpui thlak hi a hun hle a ni a ti.

Chief Minister chuan hnam anga ding chhuak tur chuan tih tur leh tih loh tur tam tak kan nei a ni a ti a. Vei tur pawh a tam hle a ni a ti. Mizorama mihring awm zat 10.9 lakhs atang hian ram pawnlam mi nuai 2 dawn vel hi englai pawhin an awm reng a ni tiin, heng mi te hian ram leilung fate thawh peih loh thawk rengin thla tin an chhungte hnenah cheng vaibelchhe 2 vel an thawn chhuak reng a ni a ti a. Hetianga kan kal zel chuan nakin lawkah ram leilung fate hi pawnlam mite hnuaiah kan kun mai ang tih a hlauhawm a ni a ti a. Chuvangin ram leilung fa, thalaite chu thangharh turin a chah a. Hei hi politics tlangkam atang mai nilo, kohhran atang leh tlawmngai pawl atangte a kan vei a tul a ni a ti.

Ram leh hnam humhalh chungchangah Chief Minister chuan ram leh hnam humhalh turin hnamin a vei angai a ti a. Zoram chhunga hnam dang ten Mizo hminga sumdawnna an kalpui chungchangah leh electoral roll chungchangah sorkarin tih dan leh tih theih chin a nei a, chutiangin hnam anga tih tur a awm bawk a ni tiin, ngaihtuah a tul hle a ni a ti.

Workshop ah hian India President hlui Dr.APJ Abdul Kalama hmathlir, tui tlem avanga nakina kan la tawn theih tur tih chu powerpoint hmanga entir a ni a. PHED Engineer-in-Chief Pu R. Lalfanliana leh Central YMA aiawh ten thusawina an nei bawk a ni.

Workshop hi Serchhip Sub Hqrs YMA President Pu R.L.Chhuanawma’n a kaihruai a. Chawnhnu lamah Er.H.Duhkima paper present sawihona neih a ni. Workshop ah hian Serchhip Sub Hqrs hnuaia YMA Group 3, Tawi Gr, Vantawng Gr leh Tuichangral ‘S’ Gr te atangin member thahnem tak an tel a ni.

Chief Minister hi Pu K. Lianzuala, MLA & Chairman, KVI Board leh Pu T.T. Zothansanga, MLA ten an tawiawm a ni.