Vawiin khan Chief Minister Pu Lal Thanhawla'n Tuipui D kama Chhimtuipui Lui chunga Jeep tlan thei tura ruahman lei inkhai dawh, Darzokai lei 'Jeepable Suspension Bridge over River Chhimtuipui at Darzokai on Hnahthial-Sangau Road' chu hawng. Lei hawnna programme ah hian Parliamentary Secretary pahnih - Pu H. Zothangliana leh Pu Joseph Lalhimpuia, Lunglei DC leh SP leh District enkawlnaa an thawhpui, PWD hotulu leh engineer te bakah Tuipui D, Darzo, Muallianpui, South Vanlaiphai leh Sangau khawtlang hruaitute leh mipui thahnem tak an tel bawk a ni.

Chief Minister Pu Lal Thanhawla chuan Chhimtuipui tawn tawn a awm mipuite harsatna sutkian nan leh inkalpawhna atan he lei pawimawh tak hawn a ni chu lawmawm tiin he lei hi a neitu rilru pua dimdawi taka enkawl turin helai bial mipuite leh he lei hmangtu zawng zawngte a chah a. Hnahthial-Sangau kawng enkawl hna chu BRO mawh anih thu sawiin PWD mawh a ni lova mahse he kawng enkawltu BRO lam an hnuchhawn deuh avangin leh an vuaicha deuh avangin lei dawh chungchangah hma an la hlei thei lo a. Mahse helai inkalpawhna hi a pawimawh em avang te, mipui mamawhna  a san viau avangte leh Sawrkarin a pawimawh zia hriain lei dawh anih theih nan hma lak a ni a, vawiina hawn a ni ta hi helai mipui tan malsawmna anih ka beisei a ni, a ti. Engkim maia ram leilung fate aia neitu an awm loh thu sawiin a chhiat a that hi kan zavai mawh a ni a, a enkawl leh a venhim te thlengin kan zavaia mawh a ni tih kan hriat a tul a, chumi rilru leh ngaihtuahna nen he lei enkawlna kawngah mipuite chu mahni ta a ni tih hria a, Sawrkar puibawm turin a chah a. Lei a tlo nan, lei zawm chungchanga dan siamte hi kan zavai kan zah leh kan zawm a ngai a, he lei, motor lian in a zawh loh nan a a kham dah anih leh Mizoram hmun thenkhata lei dawh veng turah a vengtu chowkidar dah ngai te hi Ringtu Kristian zawn atangin a zahthlak a, hei hian kan inenchian leh inbihchian a tul zia a tilang a ni, a ti a. Helai hmuna lei tlo zawk permanent bridge dawh nan Sawrkarin ngaihtuahin rilru a sen mek thu leh BRO pawhin hma lakna an neih mek thu te a sawi bawk.

Lamlian National Highway te chhiat chungchang sawiin National Highway thu ah hian PWD lamin thu an nei tlem hle a, a contract te hi Ministry lamin tender koin tualchhung contractor te chhan hleih theih loh a ni thin a, a chhangtu phai lam contractor Mizoram awmna pawh hrechiang lo ten hnaim tea chhangin a chang chuan an thawk hlei thei lo thin a, kawng thawmthatna tur sum Ministry in PWD kutah a pek loh chuan hma lak a harsa thin hle a ni, a ti.  

Chief Minister in Chhim lam lah luhka atan hman chungchang sawiin Independence hma chuan Chhim lam hi kan chhuahka ber a ni a, mahse Independence hnua Hmar lam kan hawi a, Look East leh Act East Policy hnuaia Mizoramin Chhim lam hawin Mizoram chu Asia Chhimchhak luhka ber ni turin buatsaih mek dante a sawi tel bawk a ni.  

Parliamentary Secretary te - Pu H. Zothangliana leh Pu Joseph Lalhimpuia te pawhin thusawiin he lei hawn a ni ta chu helai mipuite tan malsawmna a ni tiin Sawrkar chung lawmthu an sawi.

Lei hawnna programme hi Engineer-in-Chief, PWD PU R. Vanlaltluanga'n kaihhruaiin Chief Engineer Roads, PWD Pu K. Sawmvela'n Lei dawh chanchin sawiin Technical Report a tarlang a. Rev. K. Lalnunsanga, Hnahthial Pastorate in Lei hi Pathian hnenah hlanna neiin hunserh a hmang a, SE, Lunglei Circle, PWD Pu C. Lalchhuana'n lawmthu sawiin programme a titawp a ni.

Hnahthial leh Sangau inkar kawng hi November Ni 10, 1995 khan Border Roads Organization (BRO) kutah hlan niin a enkawlna pawh hi an huang chhung liau liau a ni a, BRO lamin lei dawh tura hma an lak mai loh avanga Chhimtuipui lui tawn tawna awmte leh mipuite au thawm hriain he lei inkhai suspension bridge dawh tura hma a lo la chho a ni.

He Lei Inkhai Suspension Bridge hi Mizoram a suspension bridge sei ber meter 200 a sei a ni a. Lei khaitu hruipui inbahna sang pahnih Pylon Tower inkar hi meter 170 niin heng pylon tower leh a hnuai lama dobelhtu 'intermediate pier' inkar hi meter 20 ve ve a ni a. Lei chhuar zau zawng hi meter 2.70 niin thingphel chhuat phah thuah hi inch 2 a chhah a ni a. A tikhawngtu atan a ban tawn tawnah 'steel built up panel' hi meter 5 zela sei 33 ve ve a awm a. A then loh nan a sir tawna thlunna (wind tie) hrui 12 a awm bawk a. Lui mawng atanga lei san zawng hi meter 12.54 a ni.

Darzokai lei dawhna sum tam zawk chu Non Lapsable Common Pool of Resources (NLCPR) kaltlangin Ministry of DoNER tum niin Mizoram Sawrkar pawhin DoNER sanction bakah mipui mamawh avangin leh he lei dawh hna zawh anih theih nan cheng nuai 50 a seng bawk a ni. He lei dawh nan hian Central Sawrkar in cheng nuai 216.21 a sanctioned a, lei dawhtu te hi S. Guha Niyogi & Associates, Engineers & Contractors, Kolkata te niin he hna work order hi an hnenah November Ni 19, 2012 pek niin kumin September ni 27 khan he hna hi zawhfel a ni. A dawh nan hian sum hmanral zat technical report a tarlan chu cheng nuai 296.18 a ni. A dawhtu te atanga a himna Safety Certificate hmuh anih hnua lei hi hawn a ni ta a ni.

He lei ah hian lirthei te chi leh sumo leh pick up rit phur, metric ton 4 (kg 4000) phur tan chauh zawh phal a ni a. Motor lian an kal luih loh nan feet 7 leh inch 4 a sangah thir kham a ni bawk a. Vawikhata lirthei pakhat chauh tlan phal niin a chak zawng pawh darkar khata km 10 tih a ni.