4394/2024-2025

Dated New Vervek, the 22nd February 2025: Vawiin khan Chief Minister Pu Lalduhoma chuan Mizoram leh Manipur inrinaa Tuivai Lei a hawng a, a hmingah Unity Bridge a vuah.

Pu Lalduhoma chuan, Selling – Tipaimukh kawng hi tun hma chuan Border Road Organization (BRO) enkawl a ni a. Lei (Bailey Bridge) hmasa ber pawh kha BRO in an dawh a ni. Mahse kum 1990 ah tui lian in a la a. Mizoram PWD hian kum 1992 khan a lei inghahna (Abutment) siam tha chuang lovin, Bailey Bridge a dawh tha leh a. Vanduaithlak takin he Bailey Bridge pawh hi kum 1997 a tui lianin a la leh ta a ni. Kum 1997 a a chhiat hma zawng kha chuan he kawngpui hi Mizoram leh Manipur inkalpawhna kawng pawimawh ber a ni thin a, Inter State Bus te pawh tlantir a ni.

Lei dawh tha leh tur hian PWD chuan hma an la leh ta a. Tui lianin a lak mai tawh loh nan Mizoram lam leh Manipur lama lei dotu (abutment) chu kum 1999 khan meter 6 laiin an tisang a. Hma an lak mek lai hian Seling to Tipaimukh road hi National Highway atana puan a ni ta a ni.

Manipur-a kan unauten harsatna an han tawk a, an mamawh engkim Mizoram lam atanga lakluh vek a tul a, Sinzawl lam kawng chauh khi kumtluana kan hman theih awm chhun a ni si a. He lei siam that hi a lo tul ta hle mai a ni. Chuvang chuan, MoRTH lamin permanent-a dawh tumin hma an la mek tih hre chungin, sum leh pai seng lutuk lo va, kan Bailey Bridge part hlui te fawm khawm a, hun engemaw chen atana hman theih tur Bailey Bridge dawh kan rilruk ta a. Hna an thawh tan lai nikum May ni 9 khan keimah ngeiin a hmun hi ka rawn tlawh a. Hmanraw thar hmanga dawh zawk turin PWD Engineer te ka hrilh ta a ni.

A tuk May ni 10, 2024 khan an sum mamawh Rs 500.00 lakhs kan sanction zui nghal bawk. Hna hmanhmawhthlak bik leh pawimawh bika kan ngaih avangin chak takin an bawhzui a, kum khat pawh a ral hmain an dawh zo va, tun thla ni 2 khan uluk takin an enchhin a, tha tawkah an ngai a. Vawiinah a lei hmasa a chhiat atanga kum 28 naah, kalphung thar, mipui sawrkar chuan kan lo dawh kai leh ta a ni.

Kawngpui tha pahnih kan lo nei dawn ta hi thaw a veng huai mai. He lei chhawr phak mipuite ka lawmpui a, Manipura kan unau harsatna tuar mekte puala theihtawp chhuaha kan dawh a nih avangin Inunauna Lei (Unity Bridge) tiin a hming ka vuah a ni. Kan PWD engineer te thawhrimna leh inpeknaah kan lawm hle a, duat takin, a dawl zawh tawk chauh nena zawhin kan enkawl dawn nia, a ti.

Pu Vanlalhlana, PWD Minister pawhin thusawiin, tuipuiin min daidan a, tun hmain lei lo dawh thin mah ila, tui lianin min laksak leh thin a. Lei a that loh kha chuan unau kan intlawhpawh thei lo va, inhnaih tak kha inhlatin kan awm phah thin. Kan sawrkar ve leh khan Pu Lalmuanpuia Punte, MLA hian he lai lei dawh a tulzia hi min hrilh a. A pawimawhzia ka hriat khan dawh ngei turin ka rilru hi a intiam a ni, a ti.

Pu Lalbiakzama, Speaker, Pu Lalmuanpuia Punte, Adviser to CM leh Pu Lalchhandama Ralte, bialtu MLA te pawhin thu an sawi ve bawk.

A hawnna inkhawmah hian Pu Lalfamkima, Dy. Speaker, Pu Lalthansanga, Forest Minister, Pu B. Lalchhanzova, Supply Minister, Pu RM Chakma, MLA te, Mizoram sawrkar official, Pherzawl district leh Mizoram lam mipui thahnem tak an tel a ni.

Technical Report hi Er. Lalsangliana Chhakchhuak, E-in-C, PWD in a pe a, he lei sei zawng hi feet 200 (TDR) a ni a, a lawn kaina lei feet 50 (DS) nei, a vaia feet 250 a sei,  Metric ton 30 dawl zo tura dawh a ni. Nimahsela, tlo leh him taka a awm theih nan 20 MT chin chauh zawhtir an phal dawn niin an sawi.

A hawnna inkhawm hi Pu K. Lalthawmmawia, IAS, Commissioner & Secretary, PWD chuan a kaihruai a, Rev. Lalhmasawna chuan hunserh hmangin, Er. Zoramliana, Chief Engineer, Highways chuan lawmthu sawiin inkhawm a khar a ni.