Chief Minister chuan India ram hi sakhaw chi hrang hrang zalenna ram a ni a, kan inzahtawn sak vek hi mitin tihtur a ni a ti. Hetia Pathian hnena hlanna neih a ni hi Mizoram tan malsawmna anih ngei a beisei thu a sawi a. Tuivawl Lei hi ropui tehchiam lo mahse a pawimawhna thukzia hi kan hriat tlan a tul a. Zoram chhuahlam tan hmasawnna tam zawk a thlen ngei a beisei thu a sawi bawk a ni. Chief Minister chuan BRO-te nen kan thawhhona a that thin thu sawiin Mizoram khawtlang leh economic hmasawnna atana thil tha tamtak an lo thawh tawh thin bawk avangin ‘Pushpak leh Mizoram hi khuanu rel a lo ni’ kan ti thin reng ani a ti. BRO-ten hetiang Lei Mizoram tana rahbi pawimawh tak an siam hi an chungah lawmthu Chief Minister chuan a sawi bawk a ni.

Tuivawl Lei, Seling leh Champhai kawng ami hi May ni 18, 2007 khan  bultan a ni a, March ni 30, 2009 khan zawhfel a ni. Senso zawng zawng chu Rs. 487.35 lakhs a ni. Eng motor pawh, sipai army tank tiamin kal thei tur leh dawlzo thei tura siam a ni.

BRO-te hian Seling leh Champhai inkar kawng 150Km-a thui hi a siam hna kum 1970 vel atang khan bul an lo tan a, hemi kawngah hian RCC-a siam Lei panga(5)-ah pali (4) chu zawhfel a ni tawh a, pakhat hmabak hi 2011-a peih hman beisei a ni bawk. Tin, BRO hian Mizoram chhungah a vaiin 2500Km. vela thui motor kawng an lo siam tawh a, chumi atanga 1150Km. chu Mizoram PWD hnenah an hlan tawh a ni. Tunah hian Project Pushpak hian Mizoram chhim leh chhak hmun kilkhawrah kawngpui thar paruk siam mek an nei bawk a ni.