2755/2022-2023
Aizawl 22.11.22: Chief Minister Pu Zoramthanga chuan tukin khan a bial Aizawl East-I chhunga Muthi, Muanna Veng leh Zuangtui a COVID-19 hrileng avanga harsatna tawk leh hmeithaite hnenah puan thui khawl 26 leh tuizem (1000 ltrs) 13 a sem.

Chief Minister chuan hripui leng avanga state mai ni lo, ram pum leh khawvel pumin harsatna a tawh dan te, kum hnih dawn chu state budget a sum dah tawh, hrileng avanga kan dawn leh tak loh avang harsatna nasa tak tawh a nih dan te a sawi a. Chuti chunga vawiin kan thleng thei hi kan vannei hle a ni, tiin boruak ziaawm chho zelah hmasawnna hna pawh theihtawp chhuah a thawh a nih zel tur thu a sawi a. Hripui leng leh harsatna dang, tum danga thleng zen zen lo thil tawn avanga state hmasawnna in a tuar phah chu pawi a tih thu a sawi a. Vawiina MLA fund atanga thil sem dawngtute chuan tangkai taka an hman a duhsak thu a sawi bawk.

Puan thui khawl leh tuizem hi MLA Fund atanga Aizawl East-I chhunga chhungkaw khawsak harsa zual thenkhat thlanchhuah hnena pek a ni a. A vaiin hemi atan hian cheng nuai riat dah a ni a. Vawiin hi a bultanna niin, bial chhung veng dangah pawh la sem chhunzawm zel a ni ang.