2754/2022-2023
Dated Serchhip, the 22nd November, 2022 : Vawiin khan Dy.Speaker Er.Lalrinawma chuan a bial chhung khua Khumtung Playground thar leh Darlawng MHIP Run, MLA Fund hmanga thawhte hawnnaah khuallian niin hun a hmang.

Khumtung Playground hawnna leh Playground thar puala Ramlai Zone Football Championship hawnna a ruala buatsaihah Khuallian Er.Lalrinawma chuan, vawiin ang hun tha leh hun lawmawm hruai thlengtu Pathian hnenah lawmthu sawiin, Khumtung khawtlang mipui te inpekna a zarah khelmual tha tak kan hawng thei ta a ni, a ti a. Khawtlang mipuite a lawmpui thu hrilhin tangkai taka hmangzui turin duhsakna a hlan a, a enkawl zui kawngah mipuite tangruala, lo duat turin a chah a ni. Infiam mite chu tualchhung inelna ringawta duhtawk lova, hmundang ramdangah inelna sang zawka tel thei khawpa rilru leh taksa lama inbuatsaih turin a fuih a, football chu Mizo thalaite thiam chi infiamna, kan thalai tam takten sum tam tak hlawha ei an zawn mekna a ni a. Khumtung thalaite pawhin chu chu kan thleng ve thei a ni, a ti. Infiamna hrang hrang kan tuipui rualin kan nitin nunphung lam te pawh uluk a ngaih thu a sawi a, thawhrimna leh Pathian rawn chung zela kal anih chuan hlawhtlinna a hnai bik a ni, a ti.

Vawiin chawhnu vek khan Darlawng MHIP RUN hawnna Er.Lalrinawma hian a nei nghal a. He hunah hian, Mizo Society-ah hmeichhiate mawhphurhna leh an dinhmun pawimawhzia sawiin, chhungkua, ram leh khawtlang tana Mizoram puma MHIP te hmalak thinna chu fakawm a tih thu a sawi bawk a ni. Darlawng MHIP te chu lawmpuiin an kal zelna turah duhsakna a hlan nghal bawk.

Darlawng Branch MHIP RUN hawnna inkhawm tawiah hian Pi Sangchuailovi Finance Secretary-in kaihruaiin Pu Haunghilhlova'n hunserh a hmang a, Pi Lalrinchhani, MHIP President-in report tawi pe in VC aiawhin Pu.Lalthakima'n thusawina a nei a ni.

Khumtung field hawnna inkhawm hi Pu Lalnunmawia, President, Ramlai Zone FA -in kaihruaiin, Pu Zoherliana Secretary-in report pekna hun a nei a. Opening Match-ah Khumtung GSA Vrs Baktawng GSA II an inkhel a ni.