2753/2022-2023
Dated Serchhip, the 22nd November, 2022: Vawiin khan Serchhip District Disaster Management Authority huaihawtin Serchhipin lirnghing na tak a tawka, mi 20 chuang thihna leh mi 50 chuangin hliampui an tuara, building chim engemawzat leh kawng ping hmun thenkhata a awm anga ngaia chhanchhuahna hna thawh chhinna, Earthquake Mega Mockdrill buatsaih a ni.

Zing dar 11:00AM ah lirnghing hi thleng anga awmtirin, District Emergency Operation Centre ah DDMA member te leh Incidence Response System members te an tlan khawm nghal a. Incidence Commander, Pi Nazuk Kumar, IAS, bawrhsap hovin hnathawh zui dan tur an rel a. Tichuan, chhanchhuahna hna thawktu Quick Response Team te, National Disaster Response Force leh Rescue Force hrang hrangte ko khawmin chhiatna thlenna hmunah an tir chhuak nghal a ni. Chhanchhuaktute hian in chim kar atanga hliam tuarte chhanchhuah hna leh nunna chante lakchhuah hna thawkin Serchhip District Hospital ah an phur thleng hlawm a. District Disaster Management Plan ina chhiatna a lo thlena mawhphurhtu chi hrang hrang a ruatten a tak ang thei ber turin hna an thawk chhin a ni.

Chhiatna thlenna hmun leh chhanchhuahna hna thawhna hmun tinahte endiktu (Observer) inruat vek a ni a. Anni hian National Disaster Management Authority in report thehluh dan tur a ruat angin report an thehlut a, Mizoram sawrkar District Incidence Response System (IRS) hnuaia Second in Command, Information & Media Officer of IRS, District Information & Public Relations Officer chuan Mockdrill hi Full Video Coverages a siam bawk.

Tlaiah DC Conference Hall ah a tlirletna (debriefing) buatsaih zui leh a ni a. Hetah hian Observers te, NDRF aiawhte, Quick Response Team aiawhte leh IRS a mawhphurhna neitu thenkhatten an thil hmuh hrang hrangte, a tak takin heng thil hi lo thleng ta se engtenge kan mamawh belh tur ni ang tih an hmuh dante chipchiar takin report an pe a ni.