2752/2022-2023
Kolasib dated 22nd Novemebr 2022: Vawiin khan Parish Hall, Kolasibah DC Office, District AIDS Prevention & Control Committee leh Sub-Headquarters YMA, Kolasib tangkawp buatsaih, thalaite HIV lak a inveng tur a inzirtirna beihpui,’Zoram Hrah Rawh’ Campaign hman a ni a. Pu K.Laldawngliana, MLA, 4-Tuirial Assembly Constituency, Vice Chairman, Commerce & Industrial Board chu khuallian niin Pu Thomas D. Lalengliana, President, Sub Headquarters YMA chuan hun a kaihruai a ni.

Khuallian Pu K.Laldawngliana, MLA chuan hnam anga ram pum huap a dinhmun tha tak tak kan hauh lai a HIV vei tam lam a dinhmun duhawm loh tak kan luah mek chu insiamtha tur a thanharh a hun tak zet thu leh insiamtha tur chuan mimal tin an pawimawh thu a sawi a. HIV lak a him tur chuan nun uluk leh thianghlim, mahni inthununtheihna leh thuawihna neih a pawimawh thu sawiin HIV inkaichhawn theihna hluar ber chu insumtheihna hmang a do hneh theih a nih thu khuallian chuan a sawi bawk a ni.

Pu K.Laldawngliana chuan HIV vei mek te chu enhranna tel lo leh thlahthlam miah lo a, an mamawh ang enkawlna pek bak ah nunphung pangai an zawh chhunzawm theihna tur a beiseina siam sak a pawimawh thu tarlangin, hemi kawngah hian khawtlang ang pawh a thawhhona tha a awm a tul thu a sawi. Tuirial bialtu MLA chuan hnam ang zawng a hmasawnna kawng kan zawh mek ah Social media hman chin tawk inzirtir a pawimawh thu te, zo nun ze mawi chawi nun te, khawtlang a dikna, rinawmna leh tlawmngaihna chawisan inzirtirte chu thil pawimawh tak a nih thu a sawi bawk a ni.

Pu John LT Sanga, Deputy Commissioner, Kolasib chuan kalkhawmte lawmna thu sawiin ‘Zoram Harh Rawh’ Campaign chu HIV hrik inkaichhawn dan inhrilhriatna leh he natna lak a kan fihlim theih nana inzirtirna hun pawimawh tak a nih thu a tarlang a. Hnam ang a min tibuaitu leh min timualphotu natna chu mimal tin inthununtheihna hmang a hneh theih a nih angin HIV hrik do hneh tur hian mi tin kan pawimawh thu a sawi.

Dr. Lalawmpuia Chhangte, Chief Medical Officer tarlan danin kum 2002 – 2022 October thleng hian Kolasib district hmun hrang hrang a thisen 85096 endik tawh ah HIV hrik pai 1690 hmuh a ni tawh a, October 2022 chhung a thisen 580 endik zing a 7 chu HIV positive an nih thu a sawi. Chawhrualin thisen endik atangin za zel a 1.98 chu HIV hrik pai an ni. Dr. Lalawmpuia Chhangte chuan tunlai hian nun uluk loh vang a dam lohna a tam thu sawiin AIDS mai bak ah BP sang, zunthlum leh stroke vang a dam lo an tam thu a sawi a. Heng natna te hi mahni inthununna leh insumtheihna hmang a hneh theih a nih thu sawiin nun kawng dik leh hrisel zawh tan turin kalkhawmte a chah bawk a ni.

‘Zoram Harh Rawh’ Campaign chawhma session ah hian Pi Lalmuanawmi, Mobile Counsellor, ICTC atangin HIV chungchang zirtirna ngiahthlak a ni a, Pi C.Vanlalremmawii, PL HIV hnen atangin fuihna thu ngaihthlak a ni bawk. Hla inphuahsiakna lawmman sem nghal niin Pi Lalzikpuii, Tumpui chuan pakhatna lawmman a dawng a, Pu C.Dartluanga, Kawnpui chu pahnihna niin Pu C.Laldinpuia, Tumpui chuan pathumna lawmman a la a ni. Chawhnu session ah hian hnam lam leh pipu zai intihsiakna neih a ni a, Kolasib district chhung a YMA branch hrang hrang telin a thlawn a HIV hrik endikna hun siam a ni bawk.