2751/2022-2023
Lunglei the 22nd November, 2022 - Vawiin khan Sertlangpui Branch YMA chuan kum 50 an tlin lawmna Golden Jubilee program Comminity Hall, Sertlangpui ah an buatsaih a. He program-ah hian Agriculture, Cooperation etc te changtu Minister leh bialtu MLA ni bawk Pu C Lalrinsanga chuan khuallian niin a hmanpui. YMA Golden Jubilee Lungphun a hawng nghal a ni.

Sertlangpui Branch YMA Golden Jubilee ah hian Sub Hqrs YMA Lunglei hruaitute, sawm bik dangte leh Sertlangpui khawtlang mipui thahnem tak an tel a ni.

Golden Jubilee lawmna inkhawm Pu K Vanengmawia, President YMA Sertlangpui Branch kaihhruaiah Pu C. Lalrinsanga chuan pawl huap zau leh zahawm, kan zonun zemawi chawi nung tu leh Zofate min khaikhawmtu pawl ropui tak YMA kan nei hi kan vannei takzet a ni tiin kalkhawmte chu Sertlangpui Branch YMA Golden Jubilee chibai a buk a. YMA Sertlangpui Branch hruaitu hmasa te zahna chibai bukin Sertlangpui mipuite chu YMA thiltumte - hun awl hman that, Kristian nun dan tha ngaihsan, Zoram hmasawnna ngaihtuah te ti hlawhtling tu ni theuh turin a sawm a ni.

Ram leh hnam humhalh a ngaih pawimawh takzet thu sawiin Agriculture Minister chuan hemi kawnga thil pawimawh hmasa ber chu mitinin mahni hna theuh taima taka kan thawh a, intodelh tura theihtawp kan chhuah tlan hi a ni, a ti a. Khawvel changkang chho zelah leilung hausakna, thing leh mau te kan ti chereu nasa hle in, tuihna te kan ti kang chat a,he kan ram kan tihchhiat tawh siamtha leh turin theihtawp a tan kan lak a tul a ni tiin hemi kawnga Agriculture Department leh Department dangte hmalakna lo tawiawma ti hlawhtling turin mipuite a sawm a. Tunlai thalaite nun khawih buai em em tu ruihhlo do kawngah leh zirna lama hmasawnna kawngah theihtawp chhuah tlang turin khawtlang mipuite a chah a ni.

Vawiin program ah hian Pu Zothanzuala Hnamte, Secretary, Sub Hqrs YMA Lunglei chuan Sertlangpui YMA Branch Golden Jubilee Souvenir lehkhabu a tlangzarh a. Hruaitu hmasate chawimawina hun pawh hman niin Cultural program hman a ni.