1590/2022-2023

Aizawl, 13.08.2022: Chief Minister Pu Zoramthanga chuan vawiin khan Tuipuiral Zirlai Pawl (TZP) Gen. Hqrs., Aizawl Fresher’s Social 2022, Chanmari YMA Hall a buatsaih chu khuallian niin a hmanpui a. E. Tuipui bialtu MLA Pu Ramthanmawia chu khualzahawm a ni.


Chief Minister chuan zirlai kalkhawmte chu zu, ruihhlo leh vaihhlo leh a kaihhnawih laka fihlim turin a chah a. Cancer vei tam zawnga India state a kaihruaitu nihna hi kan thlak dawn a nih chuan hriselna atana thalo chin hrang hrang kan neihte hi kan tlansan ngam a, indo kan puan a ngaih tawh thu a sawi a. Kan nih theih leh tih theih tur te ni theilo, ti theilo a min siamtu a ni tih hre renga nun uluk a invawn a pawimawh thu a sawi a. Chief Minister chuan freshers te chuan chang bul thar an tan chu mawi taka a tlipna an siam ngei a beisei thu a sawi. Tuipuiral Zirlai Pawl ten an bial chhung hmasawnna ngai pawimawha an hmalakna chu lawmawm tiin, hmawsawnna ruhrel din pawh a tul leh mamawh angin sawrkarin theihtawp a chhuahpui zel tur thu a sawi.

Khualzahawm MLA Pu Ramthanmawia pawhin thu sawiin, zirna in hma a sawn theihnan a kawng hrang hranga sawrkarin hma a lak dan leh, a bik takin bial chhunga zirna hmasawnna kawnga TZP te tawiawmna chu lawmawm a ti a. Mi entawntlak tak tak leh eizawnna kawnga chhuanawm tak tak an lo chhuak zelte chu lawmawm tiin, hmasawnna hmuh zel a beisei thu sawiin thalai kalkhawmte hnenah chuan an awm dan leh Pathian thu lo inmawi zel se tiin a chah a ni.

HSLC leh HSSLC exam 2022 a bialchhung atanga distinction a pass mi pali (4) te hnenah MLA award hlan a ni a. Hemi atan hian bialtu MLA chuan laptop a pe a ni. Undergraduate exam a rank holder te hnenah lawmman pek ni bawkin, rank holder pali an awm a. Anni bakah hian zirna sang zawka hlawhtinna changte hnenah lawmpuina hlan a ni bawk.


Attachment

  • Loading attachment...