Vawiin chawhnu khan Chief Minister Pu Zoramthanga chuan Union Minister of Finance Pi Nirmala Sitharaman chu a pisa ah hmuin Mizoram tana hmasawnna hna kalpui tur hrang hrang a sawipui.

Chief Minister chuan Mizoram sawrkar tharin hmasawnna chak taka kalpui turin hmachhawp hrang hrang a neih te Union Finance Minister hnenah a thlen a. Central sawrkar atanga sum hmuh theihna tura ruahmanna siam dan tur sawipuiin, a tul chuan special central assistance te pawh mamawh a nih tur thu an sawi.

Pu Zoramthanga chuan raw tha chi hmanga Mizoram leh North East economy dinhmun tha zawka hlankai a nih theih a beisei thu sawiin, project liantham kalpui turin rawtna a thlen a. Union Finance Minister chuan uluk taka lo zirchian a, a theihtawp a chhuahpui tur thu a sawi. Hei bakah hian Aizawl khawpui chhunga urban development project kal mek chhunzawm dan tur te, sustainable urban transport project kalpuia khawpui a cable cars ruahman dan tur chungchang te, 10% GBS (Gross Budgetary Support) kalpui zel tura tan lak dan tur te, External Aided Project awlsam zawk leh mumal zawka hmuh theih dan tur te, "hilly states" tana cost norms hranpa neih a tul dan te, comprehensive Mizoram Tourism Development Project kalpui a tul thu te thlenin an sawidun bawk a ni.

Vawiin ni vek chawhma dar 11 am khan Union Minister of State for DONER (I/C), Pu Jitendra Singh pawh Mizoram hmasawnna chak taka kalpui tura hmachhawp hrang hrang Chief Minister hian a sawipui bawk.

Chief Minister hi State Planning Board Vice Chairman Pu H. Rammawi, Minister of State Pu Robert Romawia Royte, Chief Secretary Pu Lalnunmawia, Planning Secretary Dr. C.Vanlalramsanga leh official dang ten an tawiawm a ni.