3224/2023-2024

Dated Aizawl, the 4th January, 2024: Vawiin khan Chief Minister Pu Lalduhoma chuan Union Home Minister Pu Amit Shah chu a pisaah a hmu a. Thil pawimawh hrang hrangte an sawi dun. Pu Amit Shah hian Myanmar ram a ralmuan hma chuan Myanmar refugee te thawn haw an tum lo tih a lo hrilh.

An inkawmnaah hian kum 2019 a Mizoram sawrkarin Household Registration Bill a lo pass tawh, India President in tun thlenga a la pawm loh chungchang an sawi dun a. He bill-a siam that ngai awm te an siam that fel hnuah a thara thehluh leh turin a lo hrilh a ni.

Pu Amit Shah hian India rama foreigner awm zawng zawng te finger print lak saka chhinchhiah chu India sawrkar policy a nih thu a sawi a, tuna Myanmar raltlan awm mekte chungchang thuah, "Myanmar ram a ralmuan hma loh chuan raltlan te hi thawnkir an ni dawn lo tih Mizoram mipuiten min lo hriat sak se ka duh a ni" tiin Myanmar raltlan te India sawrkarin a thawnkir nghal a tum loh thu Chief Minister hi a lo hrilh a ni.

Union Home Minister in Myanmar raltlante an ram a ralmuan hma loh chuan thawnkir an tum lo tih Chief Minister a hrilh hnu hian hemi chungchanga hmalak zui zel dan tur hi Chief Minister hian Union Home Secretary Pu Ajay Kumar Bhalla a sawipui leh nghal a ni.