3225/2023-2024

Aizawl, the 5th January, 2024: Transport Minister Pu Vanlalhlana chuan vawiin chawhma dar 9:30 khan Transport Department Complex, Chaltlanga siam Transport Department Retail Outlet chu khuallian niin a hawng.

Transport Minister Pu Vanlalhlana chuan Transport Department Retail Outlet hawn thar a ni leh hemi kaltlanga Petrol leh Diesel tha tak hralhchhuah a ni tur chu Department tana hlawhtlinna, bung thar kai ni leh ni chhinchhiah tlak tak a nih thu a sawi a. Retail Outlet neih theih nana hmalatu Transport Department thawktute, Legal Metrology lama thawhpuite, Indian Oil Corporation Limited aiawhte leh mi pawimawh dangte chungah lawmthu sawiin, an hmathlir, ruahmanna felfai tak leh thawhrimna avangin hmasawnna thar kan hmu a ni, a ti a. Tuialhthei mamawhna sang zelah petrol pump engemawzat awm tawh mah se mamawhna a phuhruk loh chang a awm thin a, mamawh phuhru tura ruahmanna pakhat kaltlanga Transport Department-in Retail Outlet a buatsaih hi a lawmawm hle a ni, a ti bawk.

Khuallian Pu Vanlalhlana chuan Petrol pump din tura mamawh leh tul dangte tarlangin, lirthei pung zel tana pawimawh tak Petrol pump Aizawl khawpui laili tak leh pan awlsam taka hawn a ni chu lawmawm tiin, Sawrkar tana revenue lakluhna tangkai tak a nih ngei a beisei thu leh hmasawnna ruhrel pakhat mai ni lovin mipui rawngbawlna kawnga sawrkar inpekna tilangtu zawk a nih ngei a beisei thu a sawi a. Mizoram-ah Petrol pump 55 vel a awm mek thu sawiin, Transport Department Retail Outlet chu Sawrkar enkawl mah ni se, private enkawl petrol pump anga tha taka kalpui tum tur leh pump enkawltute chu neitu thinlung pu tlat tur te, mipui tana dawr nuam leh biak nuam tunlai thiamna mila inher rem thiam mi ni turin a fuih a. Transport Department hnuaia thawktute chu Dan tlawhchhana dik taka hna thawh tum tlat tur leh mipui rawngbawl an ni tih hriaa rinawm leh dawr nuam tak nih theuh tum turin a chah a. Transport Department Retail Outlet chu mipuite'n tangkai taka an hman atan a hawng a ni.

Report petu Transport Director Er. R. Lalrammawia chuan Supply & Transport Department hnuaia kum 1975 a din, MST Wing hnuaia lirtheite tana siam Consumer Petrol Pump (CPP) chu tul leh bawhzui tur angte tihfel a nih hnuah mipui vantlang tana Petrol/Diesel lei theihna tur Transport Department Retail Outlet-ah leh a nih tak thu a sawi a. Hemi tur hian kum 2014 atangin IOC te nen indawr tanin mipui dawr theih Retail Outlet chu harsatna hrang hrang karah leh tul angte buaipui fel hnuah hawn theiha peihfel a lo ni ta a, tunhmaa Transport Department-in a lo tih angin Oil pawlh dal loh leh fir tha tak hralh chhuak tura hma an lak zel dawn thu a sawi bawk.

Transport Director chuan sawi chhunzawmin, April, 2023 ah Retail Outlet sak tan a nih thu leh December ni 28, 2023 ah IOC leh Legal Metrology Department lamin Pump Calibration an tihfel thu a sawi a. Tun dinhmunah Diesel tankey-ah trip 1 leh Petrol tankey-ah trip 1 dah niin hawnfel zawh veleh hralhchhuah nghal tum a nih thu a sawi a. Outsourcing policy kaltlanga lak thawktu 6 leh Department hnuaia thawktu nghet dangte'n a enkawl hna theihtawp chhuaha an thawh dawn thu a sawi bawk.

Tunhma chuan Transport Department hnuaiah hian lirthei 200 chuang zet a awm thin a. Heng lirtheite tan hian IOC hnuaiah Consumer Petrol Pump (CPP) din a ni a. Hun kalzelah Transport Department hnuaia lirthei awmzat tlahniam zelin hetiang a nih avang hian CPP tangkaina pawh a tlahniam zel a. Sawrkarin ngaihtuahna thar sengin CPP chu Retail Outlet-ah leh a, mipui vantlang te'n an dawr theih tura leh a, revenue lakluh theih nana siam a ti tlu ta a. IOC lamte dawrin tul angte buaipui zawhfel hnuah Transport Department Retail Outlet hi mipui dawr theiha hawn fel a ni ta a ni.

Transport Department Retail Outlet hawnna hun hi Pu Zothangzuala Chhangte, Jt. Director (Hqrs), Transport Department-in a kaihruai a. Pi H. Vanlalpuii, UDC in hunserh hmangin Pi Margaret Lalrinawmi Fanai, Jt. Director (OP), Transport Department-in lawmthu sawiin hun hman a khar a ni.