Delhi a cham mek Chief Minister Pu Zoramthanga chuan nimin khan Union Minister for Water Resources Gajendra Singh Sekhawat chu a office-ah kawm in, Mizorama ruahtui dah khawl dan chungchang leh hnianghnar zawka mitinin tui thianghlim an neih theih dan tur a sawipui.

Pu Zoramthanga chuan Mizoram chu ruahtui dawng tam state ni mahse, a khawlna lam neih that tawk loh avangin thal laiin hmun tam takah tui harsatna a thleng thin tih a sawi a. Hei hi sutkianpui turin Union Minister chu a ngen. Union Minister chuan a lo enzui tur thu a hrilhin, project siama theh lut thuai turin thu a rawn a ni. Mau leh Rua chin chu tuihna tihpun nan leh humhalh nan a tangkai dawn thu sawidun in, mau leh rua bakah sawhthing leh aieng chu nasa zawka chîng uar turin a chah bawk.

Chief Minister hi State Planning Board Vice Chairman Pu H.Rammawi, Sports Minister Pu Robert Romawia Royte, Chief Secretary Pu Lalnunmawia Chuaungo leh official dang ten an tawiawm a ni.