Vawiin hian DC Meeting Hall ah Serchhip District Sanitation Task Force chu an Chairman Pi Sangchhin Chinzah, bawrhsap ni bawk hovin an thukhawm a, kum kal meka Mizorama khawpui fai inelnaa hmalak tawh chinte thlirletin endiktuten Mark an pek dan tur duan sa zulzuia hmabak an la neihte an thlir hova. Khawpui fai ber nih ngei tuma beihpui thlak an rel.

Chairman Pi Sangchhin Chinzah chuan, nikum hmasa inelna, inelna hmasa berah hnuai takah kan awm a, mahse nasa taka tan lain nikumah erawh chuan pahnihna kan ni ta hial a. Nikuma kan beih nasatzia chu a hretute vek kan ni. Nikumah pahnihna kan nih tawh avangin kuminah chuan tum pakhat chauh kan nei thei a, chu chu pakhatna nih a ni, a ti a. Serchhip khawpuia cheng khua leh tui zawng zawngte chu kum 2019 khawpui fai inelna neih chhoh meka pakhatna ni ngei tura inbuatsaiha, tan la theuh turin a sawm. Pi Sangchhin Chinzah chuan, Serchhip neitu dik tak chu a chhunga cheng mipuite kan ni a, YMA, Village Councils leh kohhran te chu hmalakna kawnga mi pawimawh an ni, annin theihtawp an chhuah chuan pakhatna kan ni ngei ang, a ti a. District Sanitation Task Force atanga tih theih kan neih apiang kan ti zel ang, a ti bawk.

He committee ah hian Member Secretary Pi Vanthangpuii, DODU chuan khawpui fai inelnaa endiktute tehna tur duansa sawifiahin chumi huang chhunga Serchhip-a DUDO leh YMA, YMA Chhang, kohhran, VCs,  zirna in, Adventure club leh pawl hrang hrangte nena tangruala hma an lo lak tawhna te a sawifiah nghal a, hmalak a la ngaihna pawimawh zualte pawh a tarlang nghal bawk. Hmalak belh a la tulna langsar zual chu Solid Waste Management huanga bawlhhlawh tawih thei, tawih theilo leh bawlhhlawh hlauhawm (hazardous) te thliar hran chungchang (Three bin System)  a ni a.  Committee chuan, Three Bin System hi Serchhip khawpui huam chhunga Village Council tinah Pilot Project anga a bul tan nana kalpui nghal a rel a. Local tinah chhungkaw thlan bik engemawzat ten Village Council te nena tangrualin Bawlhhlawh Bawm pathum hman an tan nghal ang.

Heng bakah hian hmalakna tur hmabak tlemazawng la awm te pawh naktuk atanga chhunzawm tura rel a ni a, faina lama beihpui thlakna, mi la tih ngailoh thil thar tih tur engemawzat duan nghal a ni bawk.

Khawpui fai inelna hi chi thumah then niin Category 1 ah khawpui inelna (overall), category 2 ah District khawpui inelna (district capitals) leh category 3 ah khawpui dang (other) inelna a awm a, Serchhip hi Category 1 leh 2 huangah a tel anga, N. Vanlaiphai leh Thenzawl te chu Category 1 leh 3 ah an tel thei thung ang. Khawpui inel te hi endiktuten ni 1-20 September, 2019 inkarah an endik tura ngaih a ni.