Vawiin chawhma khan State Guests House, Chaltlang Lily Vengah Home Secretary Pu Lalbiakzama kaihruaina hnuaiah Mizoram leh Bangladesh ramri hrul district hotulute chuan inkawmna hun an nei a. Tun hi, he meeting pawimawh tak an neih vawithumna a ni a. Meeting between India and Bangladesh, Mizoram Sector hi January 22, 2015 khan Mamitah, a vawikhatna atan neih a ni a; November 25, 2015 khan Chittagong-ah neih a lo ni tawh bawk a ni.

Vawiina Mizoram leh Bangladesh aiawha ramri depa  District Deputy Commissioner te inkawmna hun hi  Chairman chuan palaite inhmelhriattirna hun hawngin tan a ni a. Meeting hnuhnungbera thil pawimawh rel te leh bawhzuina chungchang te Pi Lalbiaksangi, Addl Secretary, Home Department  chuan a  chhiar chhuak hmasa a. Hei hi  tun tuma thu pawimawh khel tur te pharhin chhunzawm a ni. 3rd Meeting between India and Bangladesh, Mizoram Sector-ah hian sawiho tura thupui 18 chhawpchhuah te chu :

1. Dankalha ramri kan 2. Ramri hrul pawikhawihna ven kawnga thawhho 3. Dan phalloh bungrua leh ruihlo tawlh dan kawnga hmalakna 4. Dankalha ramri kan leh pawikhawitute ramri kana tlanchhia thawnkirna hmun buatsaih 5.  Hmeichhia leh Naupang hralh leh tawlhruk donna kawnga tanrual dan tur 6. Khawthlang Tuipui( Karnafuli) kaltlanga Bangladesh chhunga ramngaw hausakna tawlhruk khapna 7. Furtui tam hun laia Bangladesh Tuikhuah (Kaptai Dam) in Mizoram chhung hmun hniam lai zawka tuilian a thlen lohna tura ruahmanna siam 8. District Administration leh police kaltlanga  hriattur pawimawh inhrilhtawn 9. Silsury, Marpara leh Kawrpuichhuah hmuna insumdawn tawnna 10. Dan kalha ramri hrula sumdawnna chungchang 11. Ramri hrula Joint Border survey neih 12. India leh Bangladesh  ramri chhinchhiahna  ban phun te siam belh leh a awmsa chei that 13. Ramri hungna chungchang 14.  Ramri ven kawnga Border Security Force (BSF) leh Border Guards Bangladesh(BGB) ahuhova fehchhuah thin rawtna 15.  Border Out Posts(BOP) leh CIO camp awmna hmuna Mobile Network siam 16. Puanzar hmanga Lawng chhin chhiahna  siam 17. Bandarban Hill District ramri hrula BOP siam  leh 18. Meeting hnuhnung bera thurel te bawhzui chungchang thlirletna te a ni a. Tin, thil pawimawh thenkhat pawh meetingah hian sawiho a ni tel bawk a ni.

Meeting-ah hian Mizoram aiawhin Lunglei Bawrhsap Pi K. Lalrinzuali leh SP Pu C. Lalthanmawia, Lawngtlai Bawrhsap  Pi Shashanka Ala leh SP Pu C. Lalruatkima, leh Mamit Bawrhsap Dr Lalrozama leh SP Pu Shashan K. Jaiswal te an thu a. Anni bakah hian  Dr Ch. M. Rao, PCCF,  Pu John Laldina, DIG(Hqrs), Pu CD Agarwal, DIG, BSF, SHQ , Pu B. Harris Chandra, Under secretary, MHA leh   Pi Ramdinliani, Joint Secretary bakah EF&CC, Commerce & Industries, LR&S leh Excise & Narcotics aiawh Senior Official te an tel bawk a ni.

Bangladesh aiawhin Bandarban Hill District DC&DM Pu MD Shamsul Alam leh Pu Mohammed Jakir Hossain Mazumder, Rangamati Hill District atangin Pu AKM Mamunur Rashid, DC/DM leh Pu MD Alamgir Kabir, SP. Heng  District pahnih DC leh SP te bakah Lt.Col.AHM Yeaseen Chwdhury, Director, 9 BGB, Ruma Bn., Lt.Col. Bijoy Debashish Narayon Paul, Director, 12 BGB, Chotohorina Bn., Pu Badiul Alam, Addl. DM, Bandarban Hill Dist., Pu MD Shamsul Alam, Upazila Nirbahi Officer, Ruma Bandarban Hill Dist., Pu MD Kamruzzaman, Asst. Commissioner, Bandarban Hill Dist., Pu MD Babul Sarker, Asst. Director, Narcotic Deptt. Bandarban Hill Dist., Pu SM Shafi Kamal, Addl. DM, Rangamati Hill Dist., Pi. Sagia Pervin, Upazuila Nirbahi Officer, Borkol, Rangamati Hill Dist., Pu MD Ahosan Habib Jitu, Upazila Nirbahi Officer, Baghaichari, Rangamati Hill Dist., Pu Mohammad Abdul Hamid, Asst. Director, Disitrict Narcotic Control Office, Rangamati Hill Dist., leh Pu  MD Mosharaf Hossain, Asst. Director,  Survey of Bangladesh te an tel a ni.