Jal Shakti Minister nen hian vawiin chhun khan inkawmin Chief Minister chuan tuna tui connection siam hmalakna kallai mek, Functional Household Tap Connection (FHTC) chu sawrkar laipuiin Mizoram tan a sum dah chuan a daihloh thu leh sum mamawh belh zat turte a thlen a. Tlawng lui humhalh a tinung tharleh tura hmalakna chungchanga report lo thehluh tawh bawhzui zel dan tur te a sawipui bawk. Chief Minister chuan fur laia Mizoramin ruahtui hnianghnar tak a dawn thin thu leh ruahtui khawl kalphung tha zawk neih theih a nih thu te a sawi a. Union Minister Pu Gajendra Singh Shekhawat chuan ruahtui khawl lama hmalak zel chu tha a tihpui thu leh Mizoram pawh lo tlawh ngei a tum thu Chief Minister chu a hrilh a ni.

Chief Minister hian  Jal Shakti Minister a hmuh zawh hian Finance Minister Pi Nirmala Sitharaman chu hmu in, External Aided Project hrang hrangte pawm tura file kalkawng thui lutuk thin titawi tura rawtna a lo thlen tawh hnuin Department of Economic Affairs in kalphung awlsam zawk a rawn siam ta chu lawmawm a tih thu a hrilh a. Non Lapsable Central Pool of Resources (NLCPR) hnuaia India hmarchhak state-te tana hmasawnna hna thawhna tur sum dah chu tunah hian engemawzah Ministry of DONER leh North Eastern Council (NEC) hnena la release a awmloh chungchangah Pu Zoramthanga chuan financial year 2020-21 chhung ngeia hmarchhak state te tihhmasawn nan he sum hi release tura a duh thu a thlen a. Hemi bakah hian CRF (State Roads) kalphung thlak avanga project kalpui tangkhang mek a awm thu hrilhin, direct a state hnena sum dah a nih theih nan hma lak sak turin Chief Minister chuan Finance Minister chu a ngen bawk. Finance Minister chuan India hmarchhak state te tihhmasawn chu sawrkar laipuiin a ngihpawimawh thu sawiin, Chief Minister thu thlen te chu theihtawpa a lo bawhzui tur thu a sawi a ni.

Chief Minister hi Planning Vice Chairman Pu H. Rammawi, Chief Secretary Pu Lalnunmawia Chuaungo, PHED Secretary Pu Amjad Tak leh official dangten an tawiawm a ni.