Govt Kolasib College NSS te chuan Fit India Movement hnuai a buatsaih Walkathon tukin khan an nei a, Pu K Lalrinliana, Minister, Food, Civil Supplies & Consumer Affairs chuan khuallian niin a hmanpui a, Walkathon a tel te a vailiam.

Khuallian Pu K Lalrinliana chuan tunlai natna tam tak chu kan khawsak phungin a zir loh vang a thleng a nih thu sawiin kan ei leh in ah te fimkhur a ngaih thu a sawi a, taksa insawizawi tam tur leh infiamna hrang hrang a tel thin tur a hunawl insiam a pawimawh thu a sawi bawk. Minister chuan ram hmasawn nan a ram chhunga cheng te hrisel a tul thu sawiin zirna leh eizawnna kawng ah te pawh hian hmasawn tur chuan taksa hriselna kan mamawh hmasa a ni, a ti a, Sawrkai laipui pawhin hei hi ngai pawimawhin Fit India Movement hi a buatsaih a ni, a ti bawk.

He Programme hi Pu Lalbiaktluanga Ngente Associate Professor in kaihruaiin, Pu Thangchhuana Sailo, Associate Professor in kalkhawm te lawmna thu a sawi a. Pu Vincent Lalrokima, Senior Civil Judge in zirlai leh mipui kalkhawm te chu Fitness Pledge neihpuiin Principal, Dr C Lalmuankima'n lawmthu sawina hun a hmang a ni. 

Government Kolasib College NSS Unit te hian Walkathon hi Diakkawn atanga Hmar Veng thleng ke a kalin, Minister Pu K. Lalrinliana, Principal Dr. C. Lalmuankima, NSS Programme Officer te leh College zirtirtu leh mipui engemaw zat ten an telpui a ni. He Fit India Movement hi Ministry of Sports & Youth Services, Government of India, Regional Directorate, NSS, Guwahati bul tum a buatsaih a ni.