2148/2022-2023 

Aizawl 1st October 2022: Vawiin khan Chief Minister Pu Zoramthanga’n Zemabawk North YMA inah ah Zemabawk North Area MUP buatsaih Upate Ni lawmna inkhawm a hmanpui.

Chief Minister Pu Zoramthanga chuan upate hlutzia sawiin upate kan nih hian Pathian malsawmna lallukhum kan khum nghal phawt mai a ni tih kan hriat thar a pawimawh a, kan vanneihzia leh a hlutzia hi kan hrethiam lovang tih ka hlau thin a ni, a ti a. Bible na min hrilh angina kan pawnlam taksa hi awngrawp telh telh mahsela, kan chhunglam thlarau erawh chu nitin simtharin a awm tih hi a dik hle a, upaten kan tawnhriat leh finna kan chharte hi thalai taksa la chak tha te hian han hmang thei teh sela aw, kan that lai, taksa a chak lai khan finna kan la nei tam tawk lova, kan experience in a la zo lova, thil kan ti pelh pheng phung thin a, kum upat ang zelin finna leh thlarau nunah kan nghet tulh tulh a, tangkai lo emaw kan in ti mai ang tih ka hlau thin a, kan tangkai telh tlh zawk thin a, thangtharte zingah a changkang apiangin upate hlutna an ngaipawimawh thin a ni, a ti a. Kum upat lam hi kan hman thiam a pawimawh a, nidanga kan tih ang kan ti thei tawh lova, nidanga kan tlin ang kha kan tlin tawh lo tih hi kan pawm a ngai a, chawi lena phurrit zawnga hman leh lungngaihnana kan hman chuan Pathianin kum tam min dam tirna, lallukhum min pek hi phurritah kan ngai tihna a ni dawn a, mahni in khawngaihte hi a awl thin a, Pathian hnenah tlu lutin kan vanneihna zawk hi kan hmuh len chuan kan nun a hlim ang a, kan hrisel ang a, ram leh hnam, chhungkaw tan mi hlu kan la zawk dawn a ni, a ti.

Vawiin Upate Ni lawmna programme hi Zemabawk North Area MUP President Pu CVL Rosanga’n a kaihruai a, Pu JL Khawkunga, Senior Adviser kaihhruaiin an member boralte sunna hun hman a ni bawk.