2147/2022-2023

Khuangchawi thla ni 1, 2022: Kum tina hman ṭhin, kar khat awh faina beihpui thlak, "Faina Hapta" kalpui tur chu tukin zingkar khan Lawngtlai District tan Lawngtlai Chandmary Square-ah Bawrhsap Pu Amol Srivastava chuan a hawng.

Hawnna thu sawiin, Lawngtlai Bawrhsap chuan faina beihpui thlak chu sawrkar hma lakna leh tih tur chauhvah mipuiin an ngaih a hlauhthawn thu sawiin, faina chu mi tin ta, mi zawng zawngin kan ngaih pawimawh tur a ni, a ti a. Faina Hapta chu faina kawnga mipuite rilru puthmang tidanglam a, faina leh thianghlimna kawnga tih tur leh tih loh turte mipui hnena kawhhmuhtu atana hman a nih a beisei thu sawiin, kal khawmte chu faina kawnga mi dangte kawhhmuhtu nih tum ṭheuh turin a chah nghal a ni.

Faina Hapta hawnna inkhawm hi Lawngtlai Additional Deputy Commissioner Pu James Miahlung chuan a kaihruai a. Isua Krista Kohhran pastor, Rev. Vanlalchhuanga'n hunserh hmangin, Lai Autonomous District Council (LADC)-a Hindi Education Officer Pu Alex Lalzawmpuia kaihhruaiin kal khawmte chuan faina kawnga hmahruaitu ni tura intiamna 'Pledge' an sawi rual a. Swachh Bharat Mission (Urban) Brand Ambassador Nl. K. Lalenmawii chuan a taka bawlhhlawh sawngbawl dan zirtirna 'demonstration' hun a hmang a. SBM (U) Brand Ambassador Nl. Latei Hringngen chuan zaia mipui awiin, Government Region Higher Secondary School NSS Unit chuan faina chungchang zirtirna lemchan (street play) an entir a. UD&PA Lawngtlaia District Project Officer Pi TT Beikhaizi chuan lawm thu sawiin hun a khar a ni.

Faina Hapta 2022 hi October ni 1 aṭanga ni 8 chhunga hman tur niin, thupui atan "Bawlhlawh paih hmaa thliar hran (waste segregation at source)" tih chu hman a ni. 

Faina Hapta hawnna hun hmannaah hian state leh LADC official-te, VC member-te, Village Level Sanitation Committee member-te leh Swachh Bharat Mission (Urban) Local Ambassador-te, GRHSS NSS leh Downtown English School Eco Club member-te leh tlawmngai pawl ai awhte an tel a. Hun hman zawhah hian Downtown English School Eco Club member-te'n mipui bazar turte hnenah jute bag an sem nghal a ni.

Attachment

  • Loading attachment...