Mizorama state level sports association-te insuihkhawmna pawl United Sports Association of Mizoram (USAM) in infiamite chawimawina programme USAM Awards 2016  nizan a Ignite Studio a a buatsaih chu Chief Minister Pu Lal Thanhawla leh Sports Minister Pu Zodintluanga ten an hmanpui.

Chief Minister Pu Lal Thanhawla chuan United Sports Association of Mizoram in hetianga chawimawi tlak te chawimawina programme a buatsaih chu hnam changkang zia a nih thu leh an thil tih hian infiammi midangte tan chona ropui tak a siam a beisei thu te a sawi a. Sawrkar kalta leh tuna sawrkar kal mek ah hian Sports Association hrang hrang hma lakna leh Sports Minister hma thlir tha tak nei kan neih avang te in infiamna ruhrel leh ruangam (sports infrastructure) chu Hmarchhak state te zinga, a nei tha pawl ber kan ni tawh a, India ah pawh kan duai lo a, hengte hi thalai ten chonaah pawmin hma sawn a, an hmakhua siamna atan hmang sela tiin a duh thu a sawi bawk.

Pu Lal Thanhawla chuan National level mai ni lo, International level ah te kan infiammi an lang ta te hi malsawmna ropui tak kan dawn a ni a, hei hi an tumruhmna, an inthununa leh an teirei peihna rah a ni a, a ti a. Infiammi leh sports administrator te chu kawng tin renga an nun uluk leh fimkhur tura chahin midangte tan entawntlak ni turin a fuih a. India leh China chu sports lamah teh khinin, China kan phak lohna chan chu kan rilru sutthlek dik lo avangin a thiam ber leh a tling berte thlang lovin, mahni chipui leh hnampui te duhsakin chungte chu ram aiawh tur thlan a nih fo avangte a nih thu a sawi.

Sports Minister Pu Zodintluanga chuan chanchinbute leh electronic media, a bik takin LPS leh Zonet Cable ten infiamna leh infiamna lam chanchin an ngaihven a, an puanzarna lamah nasa takin tan an la a tiin an hnathawh te chu a fak a, chawimawi phu an nih thu a sawi bawk. Sports lama hma sawnna a awm zel theih nan sports administrator te inpekna chu ropui a tih thu sawiin mahni tan hlawkna awm lovin infiamna khawvela Mizoram a than chhoh zel nana an inpekna leh an hnatawh hi a lawmawm a ni, a ti.

USAM Awards 2016 dawngtute chu  -

Coach of the Year – C. Vanlalchhuanga (Boxing);

Sportsman of the Year – Jeje Lalpekhlua (Football);

Sportswoman of the Year – H. Lalruatfeli (Hockey);

Most Promising Player of the Year (Boy) – Jeho Himnakulhpuingheta (Table Tennis);

Most Promising leh Player of the Year (Girl) – Lalhumhimi (Judo) an ni a.

Heng bakah hian LPS Vision leh ZONET Cable TV te chu USAM chawimawina hlan an ni bawk a. Sports tih hmasawn nan a an hnathawh chaiwmawi nan Parliamentary Secretary Pu KS Thanga chu USAM Special Award leh Pu Robert Romawia Royte chu Sports Promoter of the Year chawimawinate an hlan an ni a. Mizo hmeichhe zinga Mt. Everest tlang chip thleng hmasa ber Lalrintluangi pawh chawimawina thuziak an hlan bawk a ni.

USAM hi Mizorama sports association hrang hrang pawl 31 zet intelkhawmna pawl niin kum 2004 khan din a ni.