• Khawvel huapa hman thin, World Mental Health Day Vawi 20-na chu vawiin khan Vanapa Hallah, Volunteers for Community Mental Health (VOLCOMH) buatsaihna-in hman a ni a, Chief Minister Pu Lal Thanhawla chu khuallian a ni.

    Chief Minister chuan kumina thupui ‘depression - a global crisis’ tih hi a hming atang ringawt pawhin a chiang viau a ni a ti a. Tunlai khawvel thang chho zelah rilru lam harsatna hi buaipui tham a tling tak zet tawh a ni tiin, Mizote zingah pawh depression, nguina emaw hlim lohna, engemaw lai tala harsatna nei kan awm ve teuh tawh a ni a ti a. Hei hi rilru lam harsatna tlanglawn ber zinga mi nia hriat a ni a ti.

    Rilru harsatna, depression hi a thlentu tam tak a awm theih thu sawiin, Chief Minister chuan taksa harsatna leh bawrhsawmna avangte, lusunna avangte, hmangaihna lak sual avangte, sum lam harsatna avangte, nupa inkar avangte - chhan tam tak a awm thei a. Drugs leh zu ngawl vei avang te pawhin a awm thei bawk tiin, heng ngawl veina te hi sualna a nilova, harsatna chi khat enkawl theih a ni a ti a. Rilru lam harsatna hian a pui apang a thliar lo a, naupang te pawhin an nei thei a, a chhe berah phei chuan mahni intihhlum duhna thleng te pawh a thlen thei a, chuvangin ngaihthah mai mai chi a nilo a ti.He natna hi zahpui tur chi a nilova, mithiam psychiatrist te rawnin, counselling lam te pawh kan hreh tur a nilo a ti.

    Mizoramah rilru lama harsatna nei kan pung ve tial tial a, chumi lama inzirtirna atan tlawmngai pawl VOLCOMH in kum 20 chhung an lokalpui tawh hi a ropui hle a ni Chief Minister chuan a ti a. A enkawlna lamah sorkar chuan sum harsatna avangin ke a pen chak theilo a ni a ti a. Mizote hi kan pipute atangin hetiang rilru harsatna neite hi ramhuai zawl te kan ti a, khawhring lut te kan tih sak bakah kawl te kan bun tir thin a, a pawi thin hle a ni a ti a, tunah chuan a reh chho hret hret nain, inzirtirna kan mamawh tak zet a ni a ti.

    Chief Minister chuan nikum chhungin rilru na vanga mahni intihlum mipa 38 leh hmeichhia 15 an awm thu  tarlangin, he natna hi ngaihven thuai ngai chi a ni tih kan hriat a tul a ni a ti a. A enkawlna lamah damdawi leh counselling lam a that rualin, mithiam, abika zir leh train chhuak te lo chuan lo tih ve ngawt chi a nilo tih kan chian a pawimawh hle a ni a ti. Khawvel thang zelah rilru harsatna nei kan pung chho zel dawn nia a lan avangin VOLCOMH pawimawhna a sang dawn a, an hnathawh a ropui hle a ni a ti. Chief Minister chuan keini Mizo tlemte zingah, kan intanpui tawna kan vaia kan tan ho phawt chuan inenkawlna lamah nasa takin hma kan sawn ngei thei ang a ti.

    Khualzahawm Prof. R. Lalthantluanga, Vice Chancellor, Mizoram University chuan depression leh stress kan tih hi ram changkangah a nasat thu a sawi a, Mizote zingah pawh a rawn thleng chho mek a, nunna hial chan phah theihna anih avangin a chhan hriatchian a, a dolet dan leh enkawl dan kan thiam a tul hle a ni a ti.

    VOLCOMH Patron Pu Lalthanzara, Parliamentary Secretary pawhin thusawiin,rilru hrisel neih a pawimawhzia zirtir leh hrilhdarh hi VOLCOMH tum ber a ni a ti a. Rilru harsatna hi tihdam theih a ni a, counselling lak hi zahah lak tur a nilo tiin, counselling kan zak thin hi a pawi hle a ni a ti a. Damloin doctor a kan inentir ang chauh hi a ni a ti.           

    VOLCOMH hi Mizorama rilru hriselna zirtirna lama tlawmngai pawl hmasa ber a ni a. Drama te, essay inziahsiak te, debate leh TV a sawihona te-in Mizoram hmun hrang hrangah hma an la thin a ni. Tunah hian member 12 an awm mek a ni

Attachment

  • Loading attachment...