Aizawl, the 10^th October 2012 : YMA kan nei hi Mizo te tan vanneihna leh Pathian malsawmna a ni, Pu Lal Thanzara, Parliamentary Secretary to Chief Minister chuan a ti. He thu hi Zote South Community Hall-a Zote South YMA Branch Golden Jubilee lawmna a sawi a ni a.  Zote South YMA Branch chuan an Branch din kum sawmngana (Golden Jubilee) chu October ni 8 leh 9 khan an lawm a, October ni 9-a Jubilee puala lawmna programme Community Hall, Zote-a buatsaihah hian Pu Lal Thanzara chu khuallian niin  a nupui Pi Zohmingthangi pawh he programme ah hian a tel a ni.

Pu Lal Thanzara chuan Mizo faten YMAkannei bik hikanvanneihna leh Pathian malsawmna ropui tak a ni tiin Mizo mipuite fuan khawm theitu chu YMA a nih thu a sawi.  CYMA hruaitute an fakawm tiin ram leh hnam humhalh kawnga an hmalakna te, thalai suattu ruihhlo dona kawnga an hnathawh te leh Mizo inpumkhatna atan chibing inlak hranna awm lova Mizo nihna a lungawi mai tura hma an lakna te chu ram leh hnam tana YMA hnathawh ropui tak leh pawimawh tak a ni, a ti a. Sawrkar chuan YMA nen thawhhona tha tak leh duhawm tak a nei a, YMA chu sawrkar  puibawmtu leh finchhuah thintu a ni, a ti bawk.

Parliamentary Secretary chuan Zonunmawi ze tha hrang hrang hian Mizo hnam hi a hung  that tlat avangin Mizo hnam hi engmahin emaw a tihchhiat theih a rin lo thu a sawi a. Pathian rinchhana nei chung leh Zonunmawi – Tlawmngaihna hmang hian Mizo hnam hi a humhlah theih a, a humhim, theih a ni a ti bawk. 

Ramri chungchang sawiin state ramri chungchangah hriat dan inang lo emaw, ramri nia hriat inbawhchhiatsakna a lo awm chuan a sawifeltu tur chu State sawrkar te inkar ni mai tur niawm taka a hriat thu Pu Lal Thanzara chuan a sawi a. State leh state sawrkarin an chingfel thei lo a nih chuan sawrkar laipui a rawn inrawlh tur niawm tak a ni a ti bawk. Ramri chungchang hi thil harsa tak mai a nih avangin haw haw-a innawrna chi a ni lo a, fimkhur taka thil tih ngaih chi a ni, a ti.

Zote khawtlang hruaitute hian Parliamentary Secretary leh a nupui hi Em an hlan a, Pu Lal Thanzara hian silpaulin bundle khat a pe a ni.

Zote South Branch YMA Golden Jubilee lawmna programme, a nikhat ni October ni 8 zanah Community Hall a neihah chuan LAD Minister leh bialtu MLA ni bawk Pu P C Lalthanliana’n a hmanpui ve thung a ni.

Zote South YMA Branch hi October ni 9, 1962 khan din a ni a, in 140 vel awmna Zote South ah hian YMA member 550 an awm mek a. 2007 khan Zote South chuan an khaw kum za tlinna  (Centenary) an lo lawm tawh nghe nghe a ni.