2451/2024-2025 Dated

Dated Aizawl, the 10th October, 2024 : Vawiin khan Chief Minister Pu Lalduhoma chuan Vanapa Hall-a Volunteers for Community Mental Health (VOLCOMH) bultuma World Mental Health Day, 2024 lawmna chu a hmanpui. He hunah hian Pi Lalrinpuii, Health Minister leh Pu Lalthansanga, Forest Minister te pawhin an telpui bawk.

Thusawiin Chief Minister chuan, kan ngaihtuahna kal dan ang zela lungchhiaa mittui tla mai thei leh hlim taka nui thei kan ni. Rilru a hrisel loh chuan taksa a hrisel thei lo va, kan dam khaw sei thu hi taksaah chauh ni lovin kan rilru lamah a innghat tel. Kan mut theih loh chhan tam takte hi kan rilru lama thil awmte vang a lo ni fo, kan suangtuahna zawk khan mu thei lovah min siam thin. Midangte ngaidam thei lo mihring hi an dam thei lo, ngaihdam hi damna a ni. Nitin hian duhthlan theih pahnih kan nei, hlim nge lungngaih tih hi? A thlangtu chu keimahni kan ni.

Tin, Mihringin kan suangtuah, min tihlautu tam tak hi a takin a lo thleng tlem lutuk. Kan rilru lama hrisel lohna kan tawh tam tak hi chutiang suangtuahna vanga lo awm chu a ni. Kan thil thlir dan (attitude) hi a hrisel tur a ni a, kan nuna thil lo thleng tam tak hi kan tihdanglam theih loh, kan va inrawlh ve theih loh a tam. Nimahsela, chung thil kan lo dawnsawn dan zawk chuan kan chunga a nghawng dan kha a siam mai zawk a ni. Kan beisei ang thil a lo thleng ta lo a nih pawhin Pathianin duh dan dang a nei a ni tih lo pawm ve leh mai tur a ni, tiin he huna kal khawmte a chah a ni.

Pi Lalrinpuii, Health & Family Welfare Minister pawhin thusawiin, rilru hrisel nei tura thinlung lam ven that hi a tul hle a. A bik takin kan hnathawhna hmun hi kan hun tam ber kan hmanna a nih avangin a boruak kan tihnawm thiam a tul hle. Midangte tanpuitu nih duhna rilru pu chunga kan awm hian boruak nuam zawk a lo chhuak mai thin, a ti. Health Department kaltlanga mental health lama hma an lakna chanchinte pawh a tarlang.

World Mental Health Day pual hian Poster siam leh Slogan phuah intihsiakna buatsaih a ni a. Lawmman semna neih nghal a ni.

Inkhawm hi Prof Zoengpari, President, VOLCOMH chuan a kaihruai a, Pi Lalparmawii, Vice President chuan hunserh hmangin, Dr. Lalropuii chuan VOLCOMH hmalak dan leh World Mental Health Day chanchin te, kumina World Mental Health Day thupuite a sawi a. Thupui hi "It is time to prioritized Mental Health in the Workplace" a ni. Green Ribbon Club, Pachhunga University College ten lemchan tawi an entir a. Dr. R. Lalnunmawiin lawmthu sawiin inkhawm a khar a ni.

VOLCOMH hi kum 1992 khan rilru hriselna zirtirna leh rilru lama natna laka mite venhim hna thawk tura mi tlawmngaite din a ni a. Din a nih atang hian kumtin World Mental Health Day hi an lawm thin. Kum 2017 atang khan 'Teen Mental Health Initiatives'  an kalpui tan a. An thawhpui tur zirlai intelkhawm Green Ribbon Club hi Higher Secondary School pangaah leh Pachhunga University College ah te an din tawh a ni.