2450/2024-2025

Dated Hnahthial, the 10th October, 2024: Hnahthial District a Cherhlun khuaah fur zikhlum chingtute chuan an zikhlum tharchhuahte an seng leh mek a. An zikhlum seng hi a hmun ‘Zo-zau’ ah ni 7th October 2024 (Thawhtanni) khan District Horticulture Officer Pu Lalthakima leh a staff te chuan a hmunah tlawhin an enpui a ni.

Kuminah hian Cherhlun khuaah chhungkaw 42 velin fur zikhlum hi tin 40 hmun velah an ching a. An zikhlum chin hi ‘Ryozeki variety’ niin, a chi hi Horticulture department atanga an dawn mai bakah anmahni in an ininngaihtuah thin bawk a. Cherhlunah hian fur zikhlum chin hi kum 2019 atang khan Horticulture department hmalaknain enchhinna neiin bul an lo tan pui tawh a. Nikum lamah quintal 900 vel tharin kuminah erawh chuan nisa leh ruahin a tihchhiah nasat avangin quintal 700-800 vel thar an in beisei a ni. 

Cherhluna zikhlum chingtute hian ‘Zo Zikhlum Society Cherhlun’ dinin an Chairman, Pu FJ Tumsanga leh Secretary, Pu Zavela te hnuaiah nasa takin hma an la thin a. Lo neitute zikhlum tharchhuah hi Aizawl, Lunglei leh Lawngtlai ah te thawnchhuak thinin an hralhchhuahna man pawh hi a danglam ve nasa ve hle thin. Kumina an seng vanglai tak hian a hmunah kharchhawngin cheng 25 in an rawn la a. August atanga October thla chhunga phai zikhlum lakluhin a hralhna tur leh a man ah nasa takin a ngawng thin a. An chairman Pu FJ Tumsanga pawhin a hralhna lama buaina an neih ve thin avang hian an duhzat anga tam pawh chin a ngamawmloh thin thu sawiin hei hi hriaa mahni ram tharchhuah ngei hi Mizo mipuite pawh hian kan ngaihhlut a ngai takzet a ni.