2449/2024-2025

Saitual, the 10th October, 2024: Vawiin chawhma dar 10:30 am khan DC Conference Hall, Saitual-ah Right to Information (RTI) week 2024 puala hun hman a ni a, Saitual Bawrhsap Dr. Lalngura Tlau chu khuallian niin hun a hmanpui.  

He hunah hian khuallian chuan thu sawiin, RTI week hmang tura kalkhawmte chungah lawmthu a sawi a. RTI chu lang tlang sawrkar siam turin a pawimawh tih sawiin, Sawrkar inrelbawl dan leh scheme hriat chian zawk nana hmanraw tangkai tak a nih laiin mipuiten dik lo takin an hmang thin a ni, a ti. Public Interest ni loa midang khei nana hmang thin an awm avangin fimkhur a ngai lehzual tih a sawi bawk. Sawrkar hnathawkte chu mipuite hriat tur pawimawhte tarlang uar turin a chah a, social media hmangtea mipuite tana hamthatna turte leh scheme awmte puang zar thin turin a fuih a, hei hian RTI hmanga mipui zawhna awm thei tam tak a ti tlem dawn a ni, a ti. Department tina SAPIO, SPIO leh DAA te an mawhphurhna theuh hre nawn leh turin a chah a. RTI chu dan tha tak ni siin mi thenkhat hman dan dik tawk loh avangin harsatna a thleng thin a ti a, a tha zawnga hmasawn nana hmang thiam thei turin kalkhawmte chu a chah nghal bawk a ni.

Vawiin atana Resource Person Pi F. Zodingpuii, DIPRO chuan RTI Act 2005 chungchang sawi zauna hun a hmang a, RTI hman dan turte, a tangkainate, appeal dan kawngte leh SAPIO, SPIO leh DAA te mawhphurhnate a tarlang a ni.  

RTI week puala inkhawm hi Pu Lallawmawma, Addl. DC, Saitual in a kai hruai a, khuallian District bawrhsap Dr. Lalngura Tlau leh Resource Person Pi F. Zodingpuii, DIPRO te chuan thu an sawi a ni. Vawiinah hian Head of Department te, Saituala SAPIO, SPIO, DAA te, khawtlang leh NGO hruaitute an tel a ni.