Ni li, September 22-25, awh tur Inter Departmental Sports vawii 22 na chu vawiin chawhma khan Vanapa Hall-a inkhawm buatsaih ah Mizoram Chief Minister Pu Lal Thanhawla’n a hawng.

 

 

 

 

 

 

 

Infiamna chi 4, Badminton, Carrom,Chess leh Table Tennis a inelna neih tur hawnna thuchah sawiin Chief Minister chuan Mizoram sawrkar hnuaia department hrang hrang ten inelna thianghlim an neih thin chuan department inkarah inunauna leh thawhhona tha zawk thlen thei se a duhthu a tarlang a. India ram, khawvela mihring tam ber dawttu nisi hian khawvel infiamna lamah dinhmun sang a hauh phak lohna chhan chu infiammi thlan kawngah induksakna leh hnam inthliarna a awm thin vang a ni a ti.

Pu Lal Thanhawla chuan sawrkar an chelh chhung hian thalaite mamawh infiamna hmunhma leh bungrua hrang hrang bun fel chu an ngaih pawimawh hmasak anih thu a sawi a. Games and Sports hmang hian thalai nun leh an thlarau thleng pawhin kawng dik ah kan hruai thei a ni a ti.

Tunhnaia nawrhna hrang hrang chungchang sawichhuakin Chief Minister chuan Public Transport hi mipuite zangkhaina tura sawrkar ruahman anih angin an chungchang chu sawrkar thu a ni a,mahni hmasial vang ringawt in public transport operator te hian sawrkar an nek tur a ni lovang a ti a. Vairengte khawthlang hruaitute thil phut a sawilanna ah Chief Minister chuan Police Station sakna tur pawhpen hi Home Minister mimal thil tih nilovin a ngaihtuahtu tura din thuneihna sang tak nei committee thurel a ni a, National Highway dan chah hi thil thiang a ni lo a ti.

Inter Departmental Sports 2009 hawnna inkhawm hi Dr. HL Malsawma, Secretary, Mizoram Civil Service Sports & Cultural Association in a kaihruai a, Dr. Saihlira, Organising Secretary in report tawi a pe.