"Mizo hnam hi eng turin Pathianin min buatsaih a ni"-Pu Zoramthanga, Chief Minister.

Mizoram Chief Minister Pu Zoramthanga chuan YMA General Conference vawi 72-na Chhura Run, North Vanlaiphai-a neih mek chu nizan Vantlang inkhawmah khuallian niin a hmanpui a. Ni thum awh YMA General Conference hi vawiin hian a tiak ang.

YMA member kalkhawm hmaah thusawiin Mizoram Chief Minister Pu Zoramthanga chuan "Mizo hnam hi eng turin min duangin min buatsaih a ni" a ti a. Thenkhatin mizote kan fellohna leh thatlohna kan sawi uar mah mah thin a, a tulna chin chu a awm ngei pawh a ni ang, mahse ram leh mipuite tibeidawng khawpa kan chaklohna leh kan fellohna sawi a hlauhawm a ni a ti a. Zoram nula leh tlangval, zoram mipui baal hma a thingthi ngailo tam tak, ram leh hnam theihtawpa siam that tum an awm a, zoram siamtha turin anni hi Pathianin a duangin a buatsaih mek a ni a ti a. Keinin kan fellohna kan hmuh tam em em lai hian ram pawn atanga Mizoram rawn tlawhtute chuan mizote min fak em em thin thung si a ni a ti.

Chief Minister chuan mizote hi thuawih thei, a tha lam kawnga kaihhruai leh thunun nuam tak kan ni a, kan tana tha turah chuan inlungrual taka ke pen harsatlo kan nih avangin kohhran, YMA leh NGO te nen kan tan ho a hma kan lak ho chuan a tha lamah hma kan sawn duak duak mai dawn a ni a ti a. Mizoram hi Pathianin mizote tana a pek ram a nih avangin he ram atang hian eng chhuak turin min duh a, malsawmna leh duhsakna chi tinrengin min vur a kan thenawm ram te it khawpin sik leh sa nuam, ram leilung hausakna haichhuah tur tam tak, lehkhathiam tamna, hnam inpumkhat tura pawimawh tawng thukhat hmang, theirah leh thlai thatna leh ram ralmuang min pe a, hei hi chapo pui si lovin hma sawn pui i tum ang u a ti a. Europe leh khawtlang ram ropui kum zabi engemawzat lo changkang tawh te nen kan intehkhin thin a kan beidawng mai thin hi a pawi a ni a ti a, Mizoram chu rambuai vangin hun thim chhah tak kan tawng a, ram ralmuang leh zalen kan nihna pawh kum 30 deuh chauh a la ni a, heti chunga kan hmasawn dan hi chhinchhiahtlak a ni a, hei aia chak zawka hmasawn kan tum zel ang a, a chhe lai ringawt thlir lova a tha lai thlir zelin ke kan pen dawn a ni a ti a. Pathianin Mizoram min kaihhruai dan thlirin Mizote hi eng turin leh midangte entawntlak ni turin min buatsaihin min duang mek a ni tih pawm a, theihtawp chhuah a rilru dik pu a hmalam pan zel turin thalai rualte leh zoram mipuite a sawm a ni.

Chief Minister hian YMA ten nungcha, lui leh ngaw humhalh bakah sawrkar nen tangruala thil diklo a awmlohna tura an thawhhona a that avang leh nasa lehzuala hma an lak zelna tura duhsakna entirnan cheng nuai khat CYMA hotute hnenah a hlan a ni.

Nizan inkhawm hi Pu Lalhmachhuana Gen.Secy CYMA in a kaihruai a, ram leilung leh dikna humhalh tura thu thiam tiamna hun Pu Lalnunmawia Chuaungo, Chief Secretary kaihruaiin neih a ni bawk a ni.