3824/2022-2023

Aizawl, 13.03.2023: Chief Minister Pu Zoramthanga chuan vawiin khan Khatla South YMA branch Silver Jubilee lawmna, Khatla South YMA Hall a buatsaih chu khuallian niin a hmanpui.

Chief Minister chuan Khatla South branch YMA te chu silver jubilee an thleng chu a lawmpuina thu hlan in, kum 25 na lawm thei dinhmun a awm chu vanneihna a ni a ti a. Mizo khawtlang nunah YMA in hna tangkai tak tak an lo thawh tawh thin thu le khawtlang nun siamthat na atana an pawimawhna thu a sawi a. Khawtlang nun inrelbawlnaa YMA leh tlawmngai pawl dangte - kum upa atanga naupang ber huam kim vek pawl hrang hrang hlawm khawm tha tak tak kan nei hi kan vanneihna a nih thu leh chhiatni thatni a kan tangkaipui ber, kan tlansan loh atan tha a nih thu a sawi. Chief Minister chuan ram hmasawnna atan a chhunga cheng mipuite an pawimawh thu a sawi a. Kan society hi chhe lailet der leh beidawn thlak taka chhuah chu tha ber a tih loh thu sawiin, kan thatna leh chakna, midang tana entawntlak keimahni a awmte hmang hian hma kan sawm theih thu a sawi a. Mizoram din tha turin kan rama awm sa, theihna awm te chu ngaihtuahin, la hman tangkai theih ram zau tak, a chhunga chengte chawmzo tham, sik leh sa nuam tak, ruah tui duhthusam, thei leh thlai hrang hrang that duhna ram kan nei tih te hi ngaihtuahin, a chhunga chengte hian kan ram malsawmna hi kan haichhuak thei a ni a ti a. Chung a theihna hmang tangkai tur chuan a ram luahtute kan pawimwh ber thu a sawi.

He inkhawmah hian bialtu MLA Pu VL Zaithanzama pawhin thu sawiin, khawtlang nun a YMA thawhhlawk zia sawiin, ruihhlo leh chin thalo avanga enkawl ngaite buaipui an thawhhlawk zia a sawi a. Chutih rual chuan khawltang nun run a harsatna hrang hrang lo awmte hi siamthat a hma lam kan pan a tul thu a sawi a ni.

Vawiin programme hi Organizing Commt. Chairman Pu Vanlalhruaia Sailo chuan kaihruaiin, an President Pu Zahmingthanga chuan inlawmna thu a sawi a, Kum 1998 atanga 2023 chhunga Banch OB lo ni tawhte hnehah chawimawina hlan a ni bawk.