3823/2022-2023

Aizawl, the 13th March 2023: Governor Dr Hari Babu Kambhampati chuan vawiin khan Raj Bhavan-ah Rural Development Department hotulu te a kawm a. He hunah hian Ministry of Rural Development (MoRD) hnuaia thingtlangmi te hmasawnna atana hmalakna pawimawh tak tak te sawiho a ni a. PMAY-G leh NMMS hmalakna te bikah PowerPoint hmangin sawifiahna neih a ni.

Governor Dr Hari Babu Kambhampati chuan RD hnathawk te thawhrimna a zarah ni za inhlawhna pawh tluang taka kalpui a ni te, hnathawktute hmingchhinchhiahna pawh National Mobile Monitoring System (NMMS) App hmang tangkaiin hnathawktu zawng zawng zinga 72% aia tam mah dah luh thei a ni chu lawmawm a tih thu a sawi a. MNREGA hnuaia ni za inhlawhna a thawk te Bank Account-ah hlawh tha takin, a hun takah thun theih char char a ni te chu thil lawmawm tak a ni a ti.

Pradhan Mantri Awaas Yojana – Gramin( PMAY – G) hnuaia hmalakna bik sawiin he scheme pawimawh tak hi Prime Minister Narendra Modi chuan a ngai pawimawh tak zet a ti a. He hmalakna hnuaiah hian kum 2022 a ral hmain chenna in la nei lo ten chenna in an nei vek tura ngaih a nih laiin kum 2024 thlengin he hmalakna hi pawhsei a ni leh ta tih pawh a sawi a. He huntiam pawhsei leh tak chhung ngei hian he hna ropui tak hi thawk zo thei turin RD chuan theih tawp a chhuah a, a tan leh zual a ngai a ti.

Tunah hian PMAY-G hnuaiah MoRD atanga sum rawn lut tur la lut lo a awm nual a. Hei hi a chhan zawn chhuah ni se, a tul angin MoRD pawh amah ngeiin dawr a in huam thu a sawi a ni.

Governor hova review meeting-ah hian Dr Irene Zohlimpuii Chongthu, Addl Secretary, Pi Ethel Rothangpuii, Joint Secretary leh Pu Zoremthara Ralte, Deputy Secretary ten Rural Development Department ai an awh a ni.

National Mobile Monitoring System (NMMS) App hi tunhnaiah hman thar a ni a. He app hmang hian MNREGA hnuaia hnathawktute chhinchhiah a ni a, hnathawh leh a thlalak te pawh satellite hmangin endik zung zung theih a ni bawk.

Tunah hian PMAY-G tanpuina hmanga insak te chu a len zawng Metre 20 square atangin Metre 25 square ah tihlen a ni tawh a. Khua leh tui te dinhmun SECC-2011 hmanga zirchianna te khaw tina Gram Sabha ten an endik hnuah PMAY-G tanpuina dawngtu te hi thlan an ni thin a ni. He endikna hnuaia tel hman lo, insak tanpuina mamawh sit e chu Awaas+ (Additional Deserving Households) hmanga belh leh an ni bawk.

PMAY-G hnuaia insak tanpuina dawng tur hian chhungkaw 20512 te ziahluh a, tanpuina pawh pek tawh an ni a, chhungkaw tam takin chenna in an sak zawh tawh rualin, insak tanpuina la zinga a thenkhat te hi thawhkhatna leh thawhhnihna la tawh, thawh thumna leh thawh lina lak la mamawh te an ni.

PMAY-G hmalakna kal mek a hnuaiah hian tarlan a ni.

SECC

Registered - 13532 HouseHold (HH)

Sanctioned - 13532 HH

Completed - 6509 HH

Ongoing - 7023 HH

AWAAS+

FY 21-22 Target - 6980 HH

Registered - 6980 HH

Sanctioned - 6980 HH

Ongoing - 6980 HH