3822/2022-2023

Aizawl the 13th March 2023: Vawiin khan I & PR Minister Pu Lalruatkima chuan Aizawl Art Gallery, Khatla-ah Tanpuia 10th Solo Painting Exhibition chu khuallian niin a hmanpui a, exhibition hi a hawng nghal.

Minister Pu Lalruatkima chuan Aizawl Art Gallery & School of Fine Arts ten Solo Painting Exhibition an buatsaih tum 10-na alo ni ta chu lawmawm a tih thu a sawi a. Painting(Lemziak) pakhat puitlin chhung pawh hun a duh rei zia leh a hautak zia sawiin, thiamna piah lamah inpekna leh taihmakna nasa tak ngai a nih laia exhibition hial buatsaih leh theih a ni chu lawmawm takzet a ni a ti.

Khuallian chuan thusawiin painting chuan thluak hriselna a siamthat mai bakah mihringte thil vei dan a siamthain a ti thanglian a, ngaihtuahna leh thu-in a sawifiah zawh loh hi hrilhfiah thinin; lemziak-te chu an mawina mai bakah awmze thuk tak tak te an nei thin a, en ringawt pawh a mi ti hahdam sawng-sawng thei tu niin ram changkang apiang ten arts/lemziah te hi an hlutin an ngaisang em em thin a ni, a ti. Minister Pu Lalruatkima chuan lemziah hi talent anga sawi thin a nih rualin zira thiam theih thil a ni a, thiamna nei te pawh an practice nasat dan a zirin hma an sawn zel thin a ni, ti bawk. Mi hlawhtlingte chuan an hlawhtlinna phenah midangte hriatloh harsatna tam tak an paltlang thin thusawiin hlawhtlinna hi beidawnna dawt chiah ah a awm tih hre turin kalkhawmte chu a chah a ni.

Vawiin exhibition-hawnna programme hi Pi C. Zodinpuii, Joint Director SW&TA Department in a kaihruai a, I & PR aiawhin Pi K.Vanlalsangi, Deputy Director bakah Mizoram Art Development Society (MADS) member te, Film Forum leh Mizo Photographers’ Society aiawhte an kalkhawm a ni. Vawiina hawn tak solo painting exhibition-ah hian Pu Laltanpuia lemziah 46-phochhuah a ni a. He exhibition hian March 13-22 thleng a awh dawn a ni.

Attachment

  • Loading attachment...